115. Super Ave Maria.

1. Ave, patris camera,

Filii conclave,
Ave, pians scelera,

Melli fluens fave,
Ave, purgans opera,

Quae gessimus prave,
Ave, precor, celera,

Quod te laudemus suave.

2. Maria dulcedinis

Nomine vocaris,
Maria prae ceteris

Cunctis honorans,
Maria prae dominis

Superdominaris,
Margarita nominis

Verbo ne ve daris.

3. Gratia praegratior

Et praegratiosa,
Gratia praesanctior

Et praeclariosa,
Gratia praedignior,

Gratiarum rosa,
Gratia sublimior

Et plus amorosa.

4. Plena pulchritudine,

Plena caritate,
Plena sancto flamine,

Plena deitate
Plenaque dulcedine,

Plena pietate,
Plena rectitudine,

Plena veritate.

5. Dominus in gremio

Tuo dormitavit,
Dominus auxilio

Suo te ditavit,
Dominus in proprio

Suo te donavit,
Dominus in solio

Suo te locavit.

6. Tecum Dei filius,
Verus flos odoris,
Tecum est interius,
Tecum totus foris,

Tecum fuit socius
In mundo languoris,

Tecum nunc superius
In regno decoris.

7. Benedicta viscera,

Quae tu genuisti,
Benedicta tenera

Membra, quae nutristi,
Benedicta ubera,

Quae tu Iactavisti,
Benedicta opera,

Quibus hoc meruisti.

8. Tu es hortus gloriae,

Verus flos odoris,
Tu virgultum gratiae,

Sceptrum redemptoris,
Tu fructus concordiae,

Tu es pax amoris,
Tu es spes laetitiae,

Mater genitoris.

9, In omnibus omnia

Tu es universis,
In fletu solacia

Dans peccatis tersis,
In omni miseria

Subvenis dispersis,
In defectu copia,

Idem universis.
10. Mulieribus omnibus

Tu es praeclarata,
Mulieribus praemium

Tu sola praerogata,
Mulieribus praecontinens

Quia praesentata,
Mulieribus omnibus

Cuncta es lucrata.
11. Et mater et filia

Unicae personae
Et virgo nil conscia

De corruptione
Et sponsa, sed nescia

Viri laesione,
Et virtutum omnium

Illustratione.

12. Benedictus filius

Talis creaturae,
Benedictus nuntius

Talis geniturae,
Benedictus socius

Ioseph talis curae,
Benedictus obvius

Talis offerturae.

13. Fructus tuus, domina,

Cibus angelorum,
Fructus lavans crimina,

Fructus creditorum,
Fructus dans vermicula,

Fructus est iustorum,
Fructus dans libamina,

Fructus delictorum.

14. Ventris tam mirabilis
Et tum pretiosi,
Ventris tam laudabilis
Et tam fructuosi

Ventrisque tam fertilis
Et tam generosi,

Ventris tam amabilis
Et tam honorosi.

15. Tui, mater, filii,

Tui peccatores,
Tui mercenarii,

Tui servitores,
Tui via devii,

Tui erratores,
Tui sunt auxilii

Desideratores.

16. Virgo, mater omnium,

Maestos consolare
Et pro nobis filium

Tuum deprecare,
Ut non per iudicium

Velit nos damnare,
Sed aeternum gaudium

Nobis erogare.