8. Cursus de Anima Christi.

Ad Matutinum.

1. O Christi felix anima,
Sacrari tuo cultui
Fac nostri cordis intima,
Carnem subde spiritui.

2. In verbi te hypostasi
Adorant throni stupidi,
O si nos mentis exstasi
Tibi sternamur placidi.

3. Proposito consilii
Pater in te gratificat,
Adoptionis filii
Qui sint, et hos magnificat.

4. O patris secretaria,
Fac nos Dei docibiles,
Pigmenti thesauraria,
Da, simus mites, humiles.

5. Fac, pater, in paraclito
Nos conformari genito,
Configurari facias,
In nobis ut complaceas.

Ad Laudes.

1. O floridum tu lectulum
Cubantis in meridie,
Mons Iesu tabernaculum
Post velamentum gloriae.

2. Tu magni signum foederis,
Acervus testimonii,
Quem scandens tonsi velleris
Grex parte cubat solii.

3. Sub cataclismo gratiae
Das te pro nobis pretium,
In sabbatismo gloriae
Da te beatam praemium.

4. Orationum hostias,
Dicatas tuis laudibus,
Pro nobis tu suscipias
Et pro redemptis omnibus.

5. Cultu pio nos vivere
Morique tibi facias,
Trinitatis in aethere
Laudi per te nos unias.

Ad Primam.

1. O salutaris anima,
Personae verbi proxima,
Illustrans, regens condita,
Scrutans, censens abscondita,

2. Lucesce nostris mentibus,
Reduc nos ad iustitiam
Cunctisque purgans sordibus
Da nobis indulgentiam.

3. Fac, pater, in paraclito
Nos conformari genito,
Configurari facias,
In nobis ut complaceas.

Ad Tertiam.

1. Effere dignis laudibus
Te Christi quisnam anima
Possit, creatis omnibus
Praestans et divinissima?

2. Quam in persona filii
Cives adorant superi,
Vi multa pressi proelii
Te suspiramus miseri.

3. Cultu pio nos vivere
Morique tibi facias,
Trinitatis in aethere
Laudi per te nos unias.

Ad Sextam.

1. Aurora lucis rutilat,
Gaelum laudibus intonat,
Mundus exsultans iubilat,
Gemens infernus ululat.

2. Cum rex ille fortissimus
Mortis confractis viribus
Pede conculcans tartara
Solvit a poena miseros.

3. Gloria tibi, Domine,
Qui natus es de virgine,
Cum patre et sancto spiritu
In sempiterna saecula.

Ad Nonam.

1. O mens excedens aciem
Visus caeli militiae,
Piam ostende faciem
Mortis hora malitiae.

2. In meritis nos tunc tuis
Salvandos reos suscipe,
Aspectibus perpetuis
Laetandos poenis eripe.

3. Cultu pio nos vivere
Morique tibi facias,
Trinitatis in aethere
Laudi per te nos unias.

Ad Vesperas.

1, O anima mirifica
Christi Dei et hominis,
Amori nos dignifica
Laudique tui numinis.

2. Tu vas es auri solidum,
Ornatum omni lapide,
Tu concha, vellus roridum
Opusque plenum gloriae.

3. Redundans supereffluis
Abysso fontis luminis,
Undam beantem infiuis
Ipsa fons facta fluminis.

4. Sub unionis copula
Usa totali gratia,
Sub visionis specula
Freta fontali gloria.

5. Hausisti patris abdita,
Charismatum aromata,
Horum da nobis habitus
Usus per dona spiritus.

6. Fac, pater, in paraclito
Nos conformari genito,
Configurari facias,
In nobis ut complaceas.

Ad Completorium.

1. O verbo nubens anima
Sub personali copula,
Tu nostrae sis cultissima
Mentis morumque regula.

2. Tu dubio consilium,
Pectori fer auxilium,
Temptato sis praesidium,
Thesaurus mundis cordium.

3. Cultu pio nos vivere
Morique tibi facias,
Trinitatis in aethere
Laudi per te nos unias.