103. Super Are Maria.

1. Ave, mater gratiae,
Fons misericordiae,

Vitae medicina,
Summa porta veniae,
Speculum iustitiae,

Caelica regina.

2. Maria tu diceris,
Merito prae ceteris

Debes honorari,
Tolle sordes sceleris,
Da medelam vulneris,

Virgo carens pari.

3. Gratia tu dignior,
Mitis et humilior

Omni creatura,
Stellis, sole pulchrior,
Pudore nobilior,

Virgo semper pura.

4. Plena sancto flamine
Caelestique lumine

Semper circumdata,
Munda nos a crimine
Et in caeli culmine

Duc, virgo beata.

5. Dominus, rex omnium,
Te fecit triclinium

Summae maiestatis,
Non perdens per filium
Nec per puerperium
Florem castitatis.

6. Tecum non abhorruit,
Sed intrare voluit.

Mater ut dicaris,
Gabriel te terruit,
Verbum tibi praebuit,

De quo mirabaris.

7. Benedicta femina,
Virgo, caeli domina,

Mater salvatoris,
Cor meum illumina,
Propter nostra crimina

Roga cunctis horis.

8. Tu sola concipere
Puerumque parere

Christum meruisti,
Hinc pro nostro scelere
Preces velis fundere,
Mater Iesu Christi.

9. In caelesti solio
Nos iunge palatio,
Virgo, beatorum,
Funde preces filio,
Ne nos in exsilio
Simus damnatorum.

10. Mulieribus o pia,
Per te fit miseria

Nostra revocata,
Pelle procul vitia
Audique suspiria,

Mater exaltata.

11. Et da nobis gratiam
Daemonis saevitiam
Semper superare,
Voca nos ad patriam
Et misericordiam
Velis impetrare.

12. Benedictus filius,
Carnem sumens plenius

Ex te, benedicta,
Purget nos interius,
Ut sequamur melius

Salvatoris dicta.

13. Fructus ex te genitus
Fuit sancti spiritus,

Qui te sic amavit,
Verbum misit caelitus,
Incorruptam penitus

Te semper servavit.

14. Ventris claustro prodiens,
Pro nobis suscipiens

Incarnationem,
Et tu, mater, pariens
Semen viri nesciens
Nec corruptionem.

15. Tui nati filia
Genetrix egregia,

Nutrix orphanorum,
Te ducente praevia
Vocer ad caelestia

Regis angelorum.