5. De sancto Spiritu.

Ad Matutinum.

1. Nobis sancti spiritus

gratia sit data,
De qua virgo virginum

fuit obumbrata,
Cum per sanctum angelum

fuit salutata,
Verbum caro factum est,

virgo fecundata.

Ad Primam.

2. De virgine Maria

Christus fuit natus,
Crucifixus, mortuus

atque tumulatus,
Resurgens discipulis

fuit demonstratus
Et ipsis cernentibus

caelis elevatus.

Ad Tertiam.

3. Suum sanctum spiritum

Deus delegavit,
In die pentecostes

ipsos confirmavit
Et de linguis igneis

ipsos inflammavit,
Relinquere orphanos

ipsos denegavit.

Ad Sextam.

4. Septiformem gratiam

tunc acceptaverunt,
Quare idiomata

cuncta cognoverunt,
Ad diversa climata

mundi recesserunt
Et fidem catholicam

tunc praedicaverunt.

Ad Nonam.

5. Spiritus paraclitus

fuit appellatus
Donum Dei, caritas,

fons vivificatus,
Spiritalis unctio,

ignis inflammatus,
Septiformis gratiae

charisma vocatus.

Ad Vesp eras.

6. Dextrae Dei digitus,

virtus spiritalis
Nos defendat, eruat

ab omnibus malis,
Ut nobis non noceat

daemon infernalis,
Protegat ac nutriat,

foveat sub alis.

Ad Completorium.

7. Spiritus paraclitus

nos velit iuvare,
Gressus nostros regere

et illuminare,
Ut, cum Deus venerit

omnes iudicare,
Nos velit ad dexteram

suam appellare.

Conclusio.

8. Has horas canonicas

cum devotione
Tibi, sancte spiritus,

pia ratione
Dixi, ut nos visites

inspiratione,
Ut vivamus iugiter

caeli regione.