140. Super Ave Maria.

1. Ave, virginum regina,
Rosa florens sine spina,
Ave, clemens et divina,
Peccatorum medicina.

2. Maria, virgo tenella
Diceris inter agnella,
Decus morum, maris stella,
Caelica propinans mella.

3. Gratia tu gratiosa,
Mater Dei generosa,
Digna laude gloriosa,
Veri veris rubens rosa.

4. Plena angelorum laude,
Nos ab hostis salva fraude,
Cum supernis semper plaude,
In Dei visione gaude.

5. Dominus te matrem sibi
Elegit commendans tibi
Egenos, quos vult ascribi
Participes caeli cibi.

6. Tecum manet in aeternum
Iesus, quem nos coaeternum
Famus patri et supernum,
Te regens in sempiternum.

7. Benedicta, quae portasti
Christum Iesum, quem Iactasti
Gaudens, quando dilatasti
Corque Deo praeparasti.

8. Tu virtutibus ornata,
Summae Hierusalem nata,
Virgo Deo semper grata,
Prophetarum complens fata.
9. In mulieribus decora,
Semper rubens ut aurora,
Pro nobis Deum exora
In suprema mortis hora.

10. Et benedictus tuus natus,
Qui propter nostros reatus
Clavis duris vulneratus
Est et spinis coronatos.

11. Fructus iste spiritalis,
Generosus et regalis,
Pro nostris oblatus malis
Nunquam est perceptus talis.

12. Ventris sponsus de cubili
Procedens modo subtili
Nos visitat, non hostili,
Amictus vestitu vili.

13. Tui condolentes nati,
Passione liberati,
Ab ipso pie renati
Laudem demus summitati.