123. Super Ave Maria.

1. Ave, regina beata,
Quae es virgo consecrata,
Dei mater ordinata

Ante mundi principium.

2. Maria, caeli ducissa
Virginum et principissa,
Martyrum corona ipsa
Et sanctis peculium.

3. Gratia es praedotata,
Super omnes exaltata,
Ab angelis honorata
In supernali curia.

4. Plena salutis amore,
Honestate et candore,
Claritate cum splendore
Es, felix sponsa regia.

5. Dominus te procreavit
Et ornatam coronavit,
Coronatam ordinavit
Suo dilecto filio.
6. Tecum qui inhabitavit,
Requievit et cubavit,
Carnem sumptam immolavit
Crucifixus pro populo.
7. Benedicta porta caeli
Facta es omni fideli
Gratiosa dicens: veni,
Intra regnum cum gaudio.
8. Tu regina, imperatrix,
Dei, nostrum mediatrix
Ac maestorum consolatrix
Electa ab exordio.
9. In mulieribus lux es,
Virginibus semper ades,
Continentibus tu praees
Reginali imperio.
10. Et benedictus hic coetus,
Qui te adorat, sit laetus,
Qui te orat, est adeptus
Sedem in summo thalamo.

11. Fructus tuus est amoenus,
Redolens, dulcis et plenus,
In dulcore est supremus
Praegustato edulio.
12. Ventris tui illustravit
Ortus mundum , consecravit,
Peccatores liberavit
Sparso cruore roseo.
13. Iesus a patre genitus
Ex te natus humanitus,
Operatus est spiritus

Sanctus in hoc commercio.

14. Sancta, pia, iusta, bona,
Tu sola digna corona,
Quae das nobis multa bona
Omni cessante merito.

15. Maria, tu meruisti
Pura mater esse Christi,
Sola virgo peperisti

Foeno strato pro lectulo.

16. Ora pro nobis nunc Deum
Et rogare velis eum,
Quod dignetur istum reum
Recipere in gremio.