55. Horae beatae Mariae V.

Ad Matutinum.
1. Deus, qui primum hominem
de limo terrae creavit
Et ad similitudinem

Suam propriam formavit,
Te praeelegit virginem

Et in te se obumbravit,
Ut humanam propaginem
Redimeret, quae peccavit.

Ad Primam.
2. Nos Deus in hoc crimine
Pati nolens ordinavit,
Quod sicut mors in homine

Per mulierem intravit,
Sic per merita feminae
Vitam ei restauravit,
De David regis semine
Quam Ioachim generavit.

Ad Tertiam.
3. De mulierum numero
Haec sola sanctificata
Fuit in matris utero

Sanctaque semper servata,
In aevo quoque tenero

Templo fuit praesentata,
Castitatem Deo vero
Vovit sponte dedicata.

Ad Sextam,
4. Deus causa munditiae

Suae nec non sanctitatis
Carnem nostrae miseriae
Sumpsit et humanitatis,
Peperit regem gloriae

Nil habens anxietatis,
Manente pudicitiae
Floreque virginitatis.

Ad Nonam.
5. Ipsum suis uberibus
Virginali lacte pavit
Et in pannis pauperibus
Involutum comportavit
Cibisque melioribus,

Quos habuit, hunc cibavit,
Donec a puerilibus

Annis omnino migravit.

Ad Vesperas.
6. Et post Christi passionem,
Quam praesens vidit Maria,
Et eius ascensionem

Usque regna caelestia
Templi petit mansionem,
Sicut prius virgo pia,
Repetens orationem,
Donec finit vitae via.

Ad Completorium.
7. In obitu convenerunt
Eius omnes discipuli
Ipsamque sepelierunt,

Et post tres dies singuli
Corpus in sepulcro quaerunt,

Nil invenerunt seduli,
Hinc id assumptum asserunt
In caelum omnes creduli.

Recommendatio.
8. Tuae matris in honore

Has horas, Christe, diximus
Corde devoto et ore,

Mariam quoque petimus,
Ut nos nundet a foetore

Peccatorum, quae fecimus,
Precum suarum fervore

Ut in caelis secum simus.