141. Super Ave Maria.

1. Ave, virgo domina,

Plena pietate,
Ave, felix femina,

Nitens puritate,
Ave, scandens culmina

Gloriae beatae.

2. Maria culpabili
Carens corruptela,
Maria laudabili

Affluis medela,
Maria mirabili
Nos servas tutela.
3. Gratia praeveniens
Te sanctificavit,
Gratia perveniens
Te magnificavit,
Gratia perficiens
Te glorificavit.

4. Plena verbi numine
Summa creatura,

Plena sacro flamine
Paris, virgo pura,

Plena Dei lumine
Illustras obscura.

5. Dominus ingenitus
Pater te elegit,
Dominus te genitus

Matrem praeelegit,
Dominus te spiritus
Fecundat et regit.

6. Tecum tota trinitas
Manet deitatis,

Tecum est humanitas
Verbi veritatis,

Tecum est fecunditas
Et flos puritatis.

7. Benedicta viscera,
Quae Christo parasti,
Benedicta ubera,

Quibus hunc Iactasti,
Benedicta opera,
Quibus coruscasti.

8. Tu in mulieribus
Summe sublimaris,

Tu in mulieribus
Sola virgo paris,

Tu in mulieribus
Es ut stella maris.

9. Et regnas sublimior
In throno caelorum

Et es gloriosior
Choris angelorum

Et post Christum sanctior
Sorte beatorum.

10. Benedictus praeditus
Pater te creavit,

Benedictus genitus,
Qui te de manavit,

Benedictus spiritus,
Qui te consecravit.

11. Fructus vitae caelicus,
Cibus sacramenti,

Fructus est salvificus
Robur praebens menti,

Fructus est angelicus
Splendor firmamenti.

12. Ventris in hospitio
Claudis infinitum,
Ventris in sacrario

Fructum fers mellitum,
Ventris almi gremio
Deo paras situm.

13. Tui vultus claritas

Mirum dat splendorem,
Tui partus novitas

Conservat pudorem,
Tui fructus bonitas
Omnem fert dulcorem;

14. Iesus, sol iustitiae,
Salus viatorum,
Iesus, fons laetitiae,

Dator praemiorum,
Iesus, splendor gloriae
Et lux beatorum.