80. Officium Defunctorum.
Ad Matutinum.

1. Iesu, rex regum, omnium
Praevidisti criminum,
Ne sis memor peccaminum
Defunctorum fidelium.

2. Hostis disrumpe vincula,
Captivas educ animas,
Quas redemisti, recrea
In paradisi patria.

3. Sume nostra precamina,
Ima regis et supera,
Continens simul omnia
Per saeculorum saecula.

Ad Laudes.

1. Pro defunctorum requie,
Purgatorum baptismate,
Oramus inocciduam
Dei misericordiam.

2. Hos Deus pater protegat,
Ac filius suscipiat,
Et spiritus paraclitus
Emundet a criminibus.

3. Ut soluti mortalibus
Humanae carnis nexibus
In angelorum patria
Requiescant per saecula.

Ad Tertiam.

1. Devotis te concentibus,
Rex Christe regum, petimus,
Ut audias precamina,
Quae damus, et suspiria.

2. Pro cunctis nunc fidelibus
In fide morientibus
Preces et vota fundimus,
Miserere propitius.

3. Educ eos de tenebris
In paradisum luminis,
Ut in perenni gloria
Tibi vivant per saecula

Ad Sextam.

1. Iesu, piorum caritas
Et angelorum claritas,
Lux et vita viventium
Salus in te credentium.

2. Tibi commendo animas
Fidelium defunctorum,
In tuo sancto nomine
Migrantium de corpore.

3. Quos fides sancta iunxerat,
Hos patria suscipiat,
Ut in luce tua sancta
Tibi vivant per saecula.