139. Super Ave Maria.

1. Ave venerabilis
Venustate moris,
Virgo delectabilis
Sine vae doloris.

2. Maria tu proprio
Nomine vocaris,
Sonat vocis ratio,
Quod es stella maris.

3. Gratia te spiritus
Sancti fecundavit
Verbo, quod humanitus
In carnem formavit.

4. Plena Dei filium
Virgo concepisti,
Nec pudoris pallium
Partu dirupisti.

5. Dominus signaculo
Te sponsam signavit,
Quam sponsus in annulo
Suo subarrhavit.

6. Tecum habens filium
Forma deitatis
Contrahis conubium
Summae trinitatis.

7. Benedicta domina,
Regina caelorum,
Tibi laudes agmina
Canunt angelorum.

8. Tu in mulieribus
Semper benedicta,
Gratior es omnibus
Sanctiorque dicta.

9. Et cum desideriis

Optabant prophetae
Te, per quam miseriis
Imponuntur metae.

10. Benedictus omnium
Machinas rex fecit,
Caeli, terrae, marium
Quas tibi subiecit.

11. Fructus tuus creditur
Cibus angelorum,
Pascit nec depascitur
Esu commestorum.

12. Ventris in sacrario
Deum inclusisti,
Quem mannae mysterio
Mando compluisti.

13. Tui sint in gaudio
Servi tecum, pia,
Quo mater cum filio
Frueris, Maria.