39. De Conceptione BMV.

Ad Matutinum.

1. Benedicta conceptio

Virginis matris Mariae
Festivetur cum gaudio,

Assit dies laetitiae,
Laetetur tota regio

Serviens regi gloriae
Non obstante obiurgio

Detrahentis invidiae.

Ad Primam.
2. Erubescant insensati,

Qui respuunt celebrare
Mysteria tam sacrati
Diei ac festivare,
Qui fuerunt copulati,

Vir cum sua muliere,
Pessime sunt avisati
Sic volentes deviare.

Ad Tertiam.

3. Conceptio laudabilis

Ab angelo nuntiata
Mariae tam amabilis

In conceptu praeservata,
Est unde venerabilis

Ecclesia illustrata
Et in suis miraculis

Et laudibus honorata.

Ad Sextam.

4. Ave, regina caelorum,

Inter omnes mitissima,
Ave, decus angelorum

Inter omnes pulcherrima
Simul et archangelorum

Omni laude dignissima,
Quae concepta vitiorum

Sine labe purissima.

Ad Nonam.

5, Tuum corpus ac viscera,

Quae Dominum portaverunt,
Virginalia ubera,

Quae ipsummet lactaverunt,
Beata sunt et opera

Tua, et qui crediderunt,
Quod sine labe concepta

Post et ante permanserunt.

Ad Vesperas.

6. Salve, mater salvatoris,

Quae es soror insignita,
Salve, quia Deum paris,

Angelorum spes et vita,
Salve, virgo singularis,

Vera sacra margarita,
Salve, quia stella maris

Es sine labe concepta.

Ad Completorium.

7. Matris Dei conceptio

Est nostrae redemptionis
Potissima inceptio

Atque reparationis
Et, non mirum, exemptio

Antiquae contagionis
Fuit et in principio

Ipsius creationis.

Conclusio.

8. Conceptionis honore

Has horas, Christe, diximus
Corde devoto et ore

Matris tuae, quam petimus,
Ut nos mundes a foetore

Peccatorum, quae fecimus,
Precum suarum fervore,

Ut in caelo tecum simus.