32. Horae de Resurrectione Domini.
Ad Vesperas.

1. Gratulemur nisu toto
cumulando gaudia
In sollemnitatis huius
aurea vigilia.

2. In qua Christo triumphante
saevus hostis vincitur,
Pulsus homo paradiso
liber restituitur.

3. Pro hac libertate data
victori mortis gloria
Cum patre ac paraclito
nunc et sine termino.

Ad Matutinum.

1. Corpus tuum deificum,
Iesu, valde mirificum,
Mane sepulcro prodiit
Et vitam mundo tribuit.

2. Da per festum magnificum,
Quo perlustrasti saeculum,
Ut laetemur cum omnibus,
Qui gaudent in caelestibus.

3. Ob cuius reverentiam
Nunc trinitati gloriam
Omnes sensus iam concrepent
Et sine fine iubilent.

Ad Primam.

1, O dominator dominans,
Aurora semper rutilans,
De morte surgis glorians,
Caelum, terram illuminans.

2. Hac hora tu illumina
Mentes, sensus et corpora,
Ut post mundi exsilia
Tecum simus in gloria.

3. O caelorum rex optime,
Iesu, cum sancto pneumate
Districto in examine
Iunge sanctis in aethere.

Ad Tertiam.

1. O splendor patris unice,
Qui ipsa carne hodie
Surrexisti de pulvere,
Qua natus es de virgine,

2. Fac me nunc esse memorem,
Quod ad inenarrabilem
Videndam tuam speciem
Prece ducar in requiem.

3. Hora diei tertia

Nunc patri laus quam maxima
Pro nati sit victoria
Sanctique flatus gratia.

Ad Sextam.

1. O rex virtutum Domine,
Qui processisti hodie
Indutus stola gloriae,
Ut sol splendens meridie,

2. Quaerenti te iam indica,
Quis sit cibus in patria,
Quam hac die sanctissima
Ministrabis in gloria.

3. O delicate iuvenis,
Pro impendendis gaudiis
Tibi laus et imperium
Sit nunc et in perpetuum.

Ad Nonam.

1. O dies venerabilis,
Qua triumphator nobilis
Surrexisti a mortuis,
Non solus sed cum plurimis.

2. Pro immensa laetitia,
Qua pro tua victoria
Simul adimples omnia,
Nos salvos fac per saecula.

3. Haec tua resurrectio
Est omni plena gaudio,
Ergo sit laus et gloria
Trinitati per saecula.

Ad Vesperas,

1. O Christe, sponsus virginum,
Oblatus es ad vesperum,
Sed versus est in gaudium
Luctus et in tripudium,

2. Cum reviviscis hodie,
Consolator maestitiae,
Reflorens flos e tumulo
Mane primo diluculo.

3. Tibi summo laus principi
Sit, qui nunc nostri debiti
Delevisti chirographum
Et regnas in perpetuum.

Ad Completorium.

1. O tu summa benignitas
Et mira cordis suavitas,
Huius diei claritas
Finitur et serenitas.

2. Ergo educ exsilio,
Nos caeli iunge gaudio,
Quo festo hoc. gratissimo
Laetemur sine termino.

3. Iesu, nostra redemptio
Et nostra resurrectio,
Cum patre et paraclito
Laus sit tibi perpetuo.