85. Super Ave Maria.

1. Ave, candens absque vae,

Rosa puritatis,
Fons totius veniae,

Ortus pietatis,
Eva mutans in Ave,

Rubus castitatis
Ardens, paris mystice

Florem deitatis.

2. Maria errantium

Ductrix, maris stella,
Portus naufragantium

Mundi in procella,
Virtus aegrotantium,

Natum interpella,
Dira adversantium

Ne nos laedant bella.

3. Gratia tu caelica

Tota irrigaris,
Voce dum angelica

Digne salutaris,
Lex fert evangelica

Te ignaram paris,
Corda ut famelica

Pascas, coronaris.

4. Plena beneficio

Gratiae fulsisti,
Naturae condicio

Negat, concepisti
Omni carens vitio,

Deum genuisti,
Post ut ab initio

Virgo permansisti.

5. Dominus mirifice
Pater operatur,
Virginis deifice
Vellus fecundatur,

Spiritu artifice

Verbum humanatur,
Humana mirifice

Ratio miratur.

6. Tecum patriarchica

Laus et prophetalis,
Fides apostolica

Mors martyrizalis,
Virtus confessorica,

Decus virginalis,
In te lucet caelica

Dignitas totalis.

7. Tecum confidentia

Abrahae probata,
Tecum innocentia

David miserata,
Tecum sapientia

Salomonis grata,
Tecum patientia

Iob est commendata.

8. Benedicta filia
Stirpe regis nata,
Tu levas humilia,
Premis exaltata,
Christo reconcilia

Nos, ut perpetrata
Per tua auxilia
Tergat scelerata.

9. Tu in mulieribus

Hesther figurata,
De cuius muneribus

Gens est liberata
Ac manus operibus

Virtus potentata,
Capitis vulneribus

Holofernis stata.

10. Et benedictus gloriae
Rex, qui cuncta regit,
Ut firmant historiae,

Mundo te elegit,
Digna es memoriae,

Mortem per te fregit
Christus, dux victoriae,
Daemonem subegit.

11. Fructus ex te prodiit

Ut flos ex virgulta,
Terra fructum protulit

Virens sed inculta,
Qui fideles reficit

Spe salutis multa,
A qua errans deficit

Gens Iudaea stulta.

12. Ventris habitaculum

Tui adornatum
Dei fit cenaculum

Mire deauratum,
Primae sic piaculum

Feminae curatum
Et antiqui iaculum

Hostis est signatum.

13. Tui nati gratia

Nobis sit tutamen,
Ne pro contumacia

Premat nos examen,
Sed post vitae spatia

Pater det et flamen
Caeli ad palatia

Nos transire. Amen.