110. Super Ave Maria.

1. Ave, mater unica

Nostri salvatoris,
Ave, stella mystica,

Lumen viatoris,
Ave, porta caelica,

Salus peccatoris,
Ave, stella pistica

Mellei dulcoris.

2. Maria, te moribus
Virtutes decorant,
Maria, te laudibus
Caelestes honorant,

Maria te precibus
Perfecti dulcorant

Maria, te fletibus
Precantes adorant.

3. Gratia sanctissima

Facit decoratam,
Gratia dignissima

Reddit honoratam,
Gratia mitissima

Praebet dulcoratam,
Gratia piissima

Facit cunctis gratam.

4. Plena tu iuvamine

Prodes fatigatis,
Plena consolamine

Vales desolatis,
Plena pio lumine

Das lumen caecatis,
Plena medicamine

Medere gravatis.

5. Dominus ingenuam

Te praeordinavit,
Dominus prospicuam

Te praedestinavit,
Dominus contiguam

Te sibi locavit,
Dominus in strenuam

Matrem adoptavit.

6. Tecum in praesepio

Est Deus deorum,
Tecum in praeconio

Est vox beatorum,
Tecum in consortio

Chorus angelorum
Tecum et in gremio

Factor saeculorum.

7. Benedicta diceris

Et semper diceris,
Benedicta legeris

Et in aevum eris,
Benedicta ceteris

Iure praeponeris,
Benedicta fueris,

Es et semper eris.

8. Tu in mulieribus

Dignior appares,
Tu in mulieribus

Sola labe cares,
Tu in mulieribus

Sola Deo pares,
Tu in mulieribus

Mundi princeps clares.

9. Et dignum, ut pareres
Deum, Deo digna,
Et mundo succurreres,
Mitis et benigna,

Et sola praetenderes

Inaudita signa
Et illa relinqueres

Nobis fide digna.

10. Benedictus nuntius

Tibi destinatus,
Benedictus potius

Venter impraegnatus,
Benedictus filius

Ex te generatus,
Benedictus saepius

Puer nobis natus.

11. Fructus summi gaudii,

Per quem cor laetatur,
Fructusque consilii,

Quo cor consolatur,
Fructus desiderii,

Quo cor satiatur,
Fructusque solacii,

Quo cor confirmatur.

12. Ventris sancti castitas

Satanam peremit,
Ventris casti sanctitas

Peccata redemit,
Ventris mundum dignitas

A culpis exemit,
Ventris mundi pietas

Evae luctum demit.

13. Tui, virgo, nominis

Mihi des amorem,
Tui mihi luminis

Concedas nitorem
Tuique iuvaminis

Mihi des vigorem,
Tui me fac agminis

Non posteriorem.

14. Amen quisque personet

Mecum corde toto,
Amen item intonet

Clamore devoto,
Amen laete resonet

Torpore remoto,
Amen quater resonet

Ore, voce, voto.

III. Super Ave Maria.

1. Ave, mira domina,

De humilitate,
Ave, felix femina,

Nitens puritate,
Ave, scandens culmina

Gloriae beatae.
2. Maria, culpabili

Carens corruptela,
Maria, laudabili

Affluis medela,
Maria mirabili

Nos servas tutela.
3. Gratia praeveniens

Te sanctificavit,
Gratia proficiens

Te magnificavit,
Gratia perficiens

Te glorificavit.

4. Plena verbi numine
Summa creatura,

Plena sacro flamine
Paris, virgo pura,

Plena Dei lumine
Illustras obscura.

5. Dominus ingenitus
Pater te elegit,
Dominus te genitus

Matrem praeelegit,
Dominus te spiritus
Fecundat et regit.

6. Tecum tota trinitas
Manet deitatis,

Tecum est humilitas
Verbi veritatis,

Tecum est fecunditas
Et flos puritatis.

7. Benedicta viscera,

Quae Deo parasti,
Benedicta ubera,

Quibus hunc Iactasti,
Benedicta opera,

Quibus coruscasti.
8. Tu in mulieribus

Summe sublimaris,
Tu in mulieribus

Sola virgo paris,
Tu in mulieribus

Es ut stella maris.

9. Et regnas sublimior
In throno caelorum

Et es gloriosior
Choris angelorum

Et post Christum sanctior
Coetu beatorum.

10. Benedictus praeditus
Pater te creavit,

Benedictus genitus,
Qui de te manavit,

Benedictus spiritus,
Qui te consecravit.

11. Fructus vitae caelicus
Cibus sacramenti,

Fructus est salvificus,
Praebens robur menti,

Fructus est angelicus,
Splendor firmamenti.

12. Ventris in hospitio
Claudis infinitum,
Ventris in sacrario

Fructum fers mellitum,
Ventris almo gremio
Deo paras situm.

13. Tui vultus claritas

Mirum dat splendorem,
Tui partus novitas

Conservat pudorem,
Tui fructus bonitas

Omnem fert dulcorem.
14. Iosus, sol iustitiae,

Salus viatorum,
Iesus fons laetitiae,

Dator praemiorum,
Iesus splendor gloriae

Omnium sanctorum.

15. Virgo, flos munditiae,

Stellis coronaris,
Virgo, mater gratiae,

Sole perlustrans,
Virgo, datrix veniae,

Lunae principaris.

16. Mater Dei hominis,

Capax trinitatis,
Mater expers criminis,

Norma sanctitatis,
Mater veri luminis,

Fons es pietatis.

17. Dei sponsa fulgida,
Candor lucis verae,

Dei cella nitida,
Nostri miserere,

Dei mater splendida,
Semper nos tuere.

18. Ora Christum filium,

Ut vivamus tute,
Ora regem omnium

Pro mentis virtute,
Ora natum proprium

Pro nostra salute.

19. Pro nobis peccantibus
Es sic sublimata,
Pro nobis errantibus

Assis advocata,
Pro nobis precantibus
Posce cuncta grata.

20. Amen, trino numini
Gloriam canamus,

Amen, Deo homini
Gratias agamus,

Amen, matri virgini
Laudes referamus.