67. De s. Iohanne Baptista.
Ad Matutinum.

1. Dum medium silentium
Noctis tenerent omnia,
Suum praemisit radium
Verus sol in ecclesia.

2. Hic est sidus praefulgidum,
Lucens nocturno tempore,
Mundumque sanans languidum
Adhuc degens in corpore.

3. Quanti gradus vel ponderis
Baptistae sit auctoritas,
Commendando prae caeteris
Aperit prima veritas.
4. Non est vestitus mollibus
Nec similis arundini,
Sed praecelsis virtutibus
Iure praelatus homini.

5. Praestet pater cum filio
Una cura sancto spiritu,
Ut Iohannis oratio
Nos servet ab interitu.

Ad Laudes.

1. Aurora lucis rutilat

Pulsa noctis caligine,
Dum mens devota iubilat
In praecursoris nomine.
2. Dum rex ille fortissimus
Matris in alvo positus
Iohanni stetit proximus,
Ipsum replet divinitus.

3. Ille, qui clausus iacuit
Interno matris gremio,
Ut mater Christi sonuit,
Exsultavit cum gaudio.

4. Sermone blando virginis
Facto replevit filius
Matrem virtute numinis,
Quae prophetat quantocius.

5. Quaesumus, auctor omnium,
Ut Iohannis suffragio
Concedas vitae praemium
In caelesti collegio.

Ad Primam.

1. Iam lucis orto sidere

Baptistae laudis apices
Possimus digne solvere,
Precemur Deum supplices.

2. Linguam paternam reserat,
Ut nomen eius personet,
Qui prius mutus fuerat,
Ne lucis horror insonet.

3. Hinc pura cordis intima,
Vitae falget praeclaritas,
Pro salutari victima
Potus cibique parcitas.
4. Laus, honor, virtus, gloria
Trinitati sit unicae,
Quae per eius suffragia
Nos coronet salvifice.

Ad Tertiam.

1. Nunc sancte nobis spiritus,
Unum patri cum filio,
Da, Iohannem medullitus
Pia laudet devotio.

2. Os, lingua, mens, sensus, vigor,
Concordet vitae sanctitas,
Corporis abscedat rigor,
Flammescat igne caritas.

3. Praesta, beata trinitas,
Una simplex essentia,
Sequi baptistae semitas,
Ut laetemur in patria.

Ad Sextam.

1. Rector potens, verax Deus,
Qui rerum vices imperas,
Praecursorem laudat reus,
Ut per hunc culpas auferas.

2. Exstingue flammas litium,
Praebe quietem temporum,
Veram da pacem cordium,
Confer salutem corporum.

3. Praesta, beate trinitas,
Una simplex essentia,
Sequi baptistae semitas,
Ut laetemnr in patria.

Ad Nonam.-

1. Rerum, Deus, tenax vigor,
In te manens immobilis,
In nihil in me redigor,
Nisi in te sim stabilis.

2. Largire claram vespere
Per Iohannis suffragia,
Ut rupto carnis onere
Perennis instet gloria.

3. Praesta, beata trinitas,
Una simplex essentia,
Sequi baptistae semitas,
Ut laetemur in patria.

Ad Vesperas.

1. Vox clara, ecce, intonat
Verum lumen de lumine,
Verbum bonum vox personat
A solis ortus cardine.

2. Mens iam resurgat torpida,
Quae sorde exstat saucia,
Stella monstrante fulgida
Beata nobis gaudia.

3. E sursum agnus mittitur,
Qui spiritu prophetico
Praesignatus ostenditur.
Ex more doctus mystico.

4. Secundo ut cum fulseris

Iudex cunctorum, cognitor,
Praecursorem promiseris,
Audi, benigne conditor.

5. Praesta, pater piissime,
Sequi Iohannis opera,
Ut metamus plenissime
Aeterna Christi munera.

Ad Completorium.

1. Te lucis ante terminum
Precamur mente sedula,
Iesu, corona virginum,
Disrumpe natis vincula.

2. Procul recedant somnia

Et noctium phantasmata,
Praecursoris memoria
Det nobis sacra dogmata.

3. Praesta, pater, cum filio
Una cum sancto spiritu,
Ut Iohannis oratio
Nos servet ab interitu.