164. Aureum Regina Caeli.

1. Regina nobilissima,
Suscipe laeta gaudia

Resurgentis filii,
Tota simul ecclesia
Laetatur de victoria

Salvatoris Domini.

2. Caeli cives iucundantur,
Dum inferna spoliantur,

Et mors mortem superat,
Qui captivi tenebantur,
Hi per Christum liberantur,

Eosque laetificat.

3. Laetare summe poterat
Maria, quae dilexerat,

Dum vidit resurgentem,
Sublatum hunc crediderat.
Quem in praesenti viderat

Se pie consolantem.
4. Alleluia hinc cantatur,
Christus surgens videatur

A pia Magdalena,
Ut a suis inquiratur,
Praecessisse nuntiatur

In terra Gallilaea.
5. Quia qui ante planxerant,
In morte dum reliquerant,

Nunc gaudio lactantur,
Resurrexisse viderant
Et manibus palpaverant,

Hinc Deum protestantur.
6. Quem in paschali tempore
Diebusque laetitiae

Cum eis conversantem
Vident adesse sedule,
De regno suae patriae

Multis modis loquentem.

7. Meruisti generare
Dei natum mundo clare,

Virgo semper permanens,
Ipsum velis mitigare,
Dum venerit iudicare

Malos dire puniens.
8. Portare Dei filium
Inter filias hominum

Nulla digna fuerat,
Sed Deus pater omnium
Per summum suum nuntium

Te ad hoc elegerat.

9. Alleluia personemus,
Tantae matri laudes demus,

Nobis talem peperit,
Qui auferret mundi scelus,
Ne periret Adae genus,
Diram mortem pertulit.
10. Resurrexit immortalis,
Rex gloriae aeternalis,
Ultra iam non moritur.

Per virtutem deitatis
Auctor tantae maiestatis

Ad caelos transvehitur.
11. Sicut patres praedixerunt,
Adimpleta tunc fuerunt

Omnia oracula,
Mira signa claruerunt,
Fidem gentes receperant,

Baptizantur milia.
12. Dixit daturum spiritum,
Qui illustraret saeculum,

Summa Dei veritas,
Ut populis credentium
Per coetum apostolicum

Esset pia unitas.
13. Alleluia inde sonet,
Paraclitum nobis donet,

Quem suis promiserat,
Omne bonum ille docet
Et expellit, quidquid nocet,

Apud nos permaneat.

14. Ora, virgo eximia,
Ut gaudia paschalia

Tuis prosint famulis,
Et filii victoria,
Qui surrexit in gloria,

Salvet a periculis.

15. Pro nobis sis sollicita,
Ne irruant temptamina

Hostis nostris callidi,
Sed cuncta nostra opera
Sint per te Deo placita

Pacatique singuli.
16. Deum nobis propitium
Per tuum patrocinium

Sentiamus iugiter,
Carmen istud exiguum
Sit, tibi, virgo, placitum,

Suscipe hilariter.

17. Alleluia exclamare

Libet, sacrum tempus clare

Instat nunc fidelibus,
Christe, nobis nunc appare
Et post mortem tecum trahe

Tuis iungens civibus.

Orat. ms. Lehninense anni 1518. Cod. Berolinen. IV 29.