128. Super Ave Maria.

1. Ave, salus omnium,

Norma sanctitatis,
Ave, caeli gaudium,

Splendor claritatis,
Ave, decus virginum,

Mater deitatis,
Ave, obex criminum,

Claustrum trinitatis.

2. Maria, solacium

Dulce captivorum,
Maria, refugium

Patens peccatorum,
Maria, praesidium

Tutum viatorum,
Maria tripudium

Suave beatorum.

3. Gratia inseruit

Culmen naturale,
Gratia consuluit

Votum virginale
Gratiaque tribuit

Onus filiale,
Gratia exhibuit

Regnum aeternale.

4. Plena ergo floribus

Morum venustate,
Plena es coloribus

Mentis castitate
Plena et liquoribus

Prolis dignitate,
Plena es odoribus

Ac iucunditate.

5. Dominus his omnibus

Te locupletavit,
Dominus in omnibus,

Virgo, adamavit,
Dominus ex omnibus

Sponsam subarrhavit,
Dominus prae omnibus

Matrem exaltavit.

6. Tecum est redemptio,

Spes compeditorum,
Tecum miseratio,

Salus infirmorum,
Tecum iubilatio,

Iubar angelorum,
Tecum delectatio,

Dos universorum.

7. Benedicta angeli

Benedictione,
Benedicta parvuli

Exsultatione,
Benedicta filii

Parturitione,
Benedicta populi

Veneratione.

8. Tu fiscella Mosaica,

Thronus Salomonis,
Tu virga Aaronica,

Vellus Gedeonis,
Tu terra Davidica,

Mandibula Samsonis,
Tu virga prophetica,

Mater Salvatoris.

9. Intra te reponitur

Manna suavitatis,
In te nam concipitur

Flos divinitatis,
In te quoque oritur

Fons satietatis
In teque conficitur

Pastus sanitatis.

10. Mulieribus priscos
Contemptus mutasti,
Mulieribus odos
Novum inchoasti,

Mulieribus chaos
Taetrum obdurasti,

Mulieribus polos
Potens reserasti.

11. Et sic contumelia

Per te terminatur,
Et melos et gratia

Ex te innovatur,
Et limbi miseria

In te obseratur,
Et caelestis patria

Per te reseratur.

12. Benedictus Dominus

Ex te incarnatur,
Benedictus populus,

Qui te veneratur,
Benedictus animus,

Qui te meditatur,
Benedictus oculus,

Qui te conspicatur.

13. Fructus tuus croceus,

Virgo, te colorat,
Fructus tuus melleus,

Mater, de dulcorat,
Fructus tuus lacteus

Omnes nos irrorat,
Fructus hic virgineus

Superos decorat.

14. Ventris te virginitas

Reddit speciosam,
Ventris te fecunditas

Facit fructuosam,
Ventris te capacitas

Facit miraculosam,
Ventris singularitas

Probat gloriosam.

15. Tui ergo populi,

Mater, miserere,
Tui causa filii,

Virgo, nos tuere,
Tui callem meriti

Fac nos obtinere,
Tui finem praemii,

Iesum da videre.

16. Amen patri Domino
Una iubilemus,
Amen nato unico
Laeti concrepemus,

Amen pneumati sacro
Simul resonemus,

Amen choro caelico
Omnes conclamemus.