4. De sancto Spiritu.

Ad Matutinum.

1. Veni, creator spiritus,
Praecordiorum intima
Et visita divinitus
Ac doce suavissima.

2. Nostris infusus cordibus
Sensum redde pervigilem,
A cunctis purga sordibus
Cor, mentem da et humilem.

3. Mores, actus, eloquia
Tua rege potentia,
Virtutum affluentia
Sit munda conscicntia.

Ad Laudes.

1. Lux surge nobis aurea,
Superni iubar luminis,
Corda redde aetherea
Virtute tui numinis.

2. Veni, largitor munerum,
Solator suavissime,
Nostrum sis memor pauperum,
Spes, vita, salus animae.

3. Tu largitas melliflua,
Da gratiam petentibus,
Suavitas largiflua.
Instilla nectar mentibus.

Ad Primam.

1. Fons vitalis, caritas,
Caritatem cordibus
Da, lux mentalis, claritas,
Infunde lumen sensibus.

2. O quam salubris unctio,
Quae menti dat tripudium,
Per quam fluit compunctio,
Salus, perrenne gaudium.

3. Virtutum pater optime,
Tu visita nos iugiter,
Ut videndo sanctissime
Te laudemus perenniter.

Ad Tertiam.

1. Nunc sancte nobis spiritus
Devotionis gratiam
Infunde, lumen caelitus,
Virtutum abundantiam.

2. Compunctionis fluvium,
Da gaudium cum gloria,
Unctionis convivium
Post intima suspiria.

Ad Sextam.

1. Rector potens, qui cordium
Meridiem sic instruis,
Amoris igne sordium
Caliginem qui destruis,

2. Aestum fuga luxuriae,
Litis et immunditiae,
Ut nos conformes gratiae
Heredes simus gloriae.

Ad Nonam.

1. Rerum causa efficiens,
Implens et regens omnia,
Fons vivub indeficiens,
Nos recreans inebria.

2. Astantes tuis laudibus
Nos visita continuo,
Sacris pleni virtutibus
Ut vivamus perpetuo.

Ad Vesperas.

1. Veni, pater orphanorum,
Veni pie, ne moreris,
Veni, pater egenorum,
Et egenum consoleris.

2. Veni, sacrum pneuma, veni,
Perfla suavissime
Velut auster flatu leni
Hortum meae animae.

3. Et a vitiis emunda,
Ut sic sanctis moribus,
Plena sit atque fecunda
Et virtutum floribus.

Ad Completorium.

1. Te lucis ante terminum,
Precamur, sanctum spiritum,
Ut custos clementissime
Sis corporis et animae.

2. Procul pelle daemonia,
Polluta fuge somnia,
Et universa noxia,
Quae mens abhorret anxia.

3. Sit nobis in te requies,
Quietam noctem tribue,
Lux mentis et meridies,
Dies lucis perpetuae.