7. De Nativitate Domini.

Ad Vesperas.

1. Caelum ac terra gaudeat
Et hymnum novum concinat
In hac sacra vigilia
Pro nati regis gloria.

2. In forma servi Bethlehem
Caelestis dux Ierusalem
Mariae carne nascitur,
Cui omne genu flectitur.

3. Laos infanti, qui nascitur,
Laus patri, a quo mittitur,
Laus sancto sit consilio
In regni eius solio.

Ad Completorium.

1. Caelestis rex Ierusalem,
Qui nasceris in Bethlehem,
Quis tua valet promere
Mira vel intellegere?

2. Qui cum sis rex omnipotens,
Infirmus nunc et impotens
Virtutis tuae gratiam
Celasti per infantiam.

3. Tua misericordia
Et infinita gratia
Te trahens caeli gloria
Vestivit carnis tunica.

4. Unde laus sit quam maxima
Deo patri per saecula
Tibique, unigenite,
Qui imperas cum pneumate.

Ad Matutinum.

1. Salve, Iesu dulcissime,
Qui puer natus hodie
In civitate Bethlehem;
De caelesti Ierusalem

2. Te traxit in exsilium
Dilectis in solacium,
Qua maior non est, caritas
Et inexperta bonitas.

3. Cunctis erectis sensibus
Iam sursum in caelestibus
Te Deum natum humilem
Mihique colo similem.

4. Laus tibi sit perpetua,
Trinitatis essentia,
Fac nos caeli palatio
Collaetari perpetuo.

Ad Primam.

1. Infans Iesu pulcherrime,
Mariae qui de corpore
Ut flos prodit de gramine,
Tu processisti hodie.

2. Flos campi, rosa, lilium,
Mariae puerperium,
Per tuam natalitium
Fac, tecum sim in sacculum.

3. Aeterna laus et gloria
Et festiva laetitia
Caeli resultet curia
Trinitati per saecula.

Ad Tertiam.

1. O trinae splendor gloriae,
Caelesti lucens culmine,
In cunis virgo fasciis
Te cingit et panniculis.

2. Ploranti praebet ubera
Et fovet te per balnea,
Infigit ori oscula,
O quam felix puerpera!

3. Dum virgo mater recolit,
Quis, qualis, quantus, unde sit,
Adorat ex se genitum
Et Dei patris unicum.

4. Pro tua magna gloria
Et pietate maxima
In angelorum curia
Laus sit tibi per saecula.

Ad Sextam.

1. O regnans alto cardine,
Iesu, frater dulcissime,
Fac me laetare hodie
Cum omni tuo plasmate.

2. Maria, mater inclita,
Laetare iam et iubila,
Qui pater est et dominus,
Fit quoque tuus filius.

3. Quis cogitare poterit,
Quantum cordi tunc fuerit
Infusum pium gaudium,
Cum peperisti Dominum?

4. Nullus illud mortalium
Valebit in perpetuum.
Ergo sit laus et gloria
Trinitati per saecula.

Ad Nonam.

1. Nunc tempus adest gratiae,
In quo natus rex gloriae
Salvator et Emanuel
In civitate Bethlehem.

2. Gaude, mater dulcissima,
Tu, virgo, virga florida,
Osculare iam filium,
Amplectens cole Dominum.

3. Laus sit patri perpetua
Eiusque nato gloria,
Honor sit sancto fiatui
Deo nostro amabili.

Ad Vesperas.

1. Haec est dies laetitiae,
Quae nos illustrat hodie,
Cum tu Deus altissimus
Infans factus es parvulus.

2. Natus matre castissima,
Cuius prece continua
Temet cum ipsa cernere
Fac nos in regno gloriae.

3. Laus sit tibi per saecula,
Qui regna regis caelica
Et matris sugens ubera
Simul adimples omnia.

Ad Completorium.

1. O descendens rex gloriae
In vallem hanc miseriae,
Hoc festum da cognoscere
Mundumque cor apponere.

2. Amore perfectissimo
Adhaerere perpetuo
Fac me tibi gratissimo
Aeterni regis filio.

3. Tu iacens diversorio
Pannorum nunc involucro,
Quamvis caeli sis Dominus,
Apparens hic pauperrimus.

4. Tibi, Iesu, melliflua
Laus, honor sit et gloria,
Qui iaces in praesaepio,
Caeli regnas palatio.