21. Horae de Passione Domini.
Ad Matutinum.

1. Lux mundi, sol iustitiae,
In primo noctis tempore
Ad patrem precem supplicem
Fundendo sudat sanguinem.

2. Guttatim currens undique
De sacro suo corpore
Horrorem mortis indicans
Et poenas diras explicans.

3. Per signum pacis traditur,
Ut latro vinctus ducitur
Sacrilegorum manibus
Sistendus pontificibus.

4. Salutis fons et gratiae,
Splendor supernae patriae,
De nocte nos miseriae
Perduc ad diem gloriae.

Ad Laudes.

1. Auctor salutis unicus,
Mundi redemptor inclitus,
Pro nobis nunc iniurias
Suffert et contumelias.

2. En falsos testes patitur,
Per quem nil mali agitur,
Ut eum morti traderent
De terraque eraderent.

3. Tunc coram pontificibus
Et ceteris astantibus,
Dum veritatem loquitur,
Blasphemasse astruitur,

4. Hinc reum mortis clamitant
Et colaphis percutiunt,
Hinc velant, spuunt, alapant
Et clarum vultum lacerant.

5. Nostrae noctis caligine
Contenebratus, Domine,
Tu nostri cordis intima,
Dei splendor, illumina.

Ad Primam.

1. Diei ad diluculum

Fit magnum, en, concilium,
Iesus Pilato traditur
Et nequiter impetitur.

2. Sed tacet summa veritas,
Et dominatur falsitas,
Nam iudicari sustinet,
Ut nobis iudex parceret.

3. Ad Herodem transmittitur,
Accusatus contemnitur,
Alba veste illuditur,
Pilato sic reducitur.

4. Benigne rex iustitiae,
Pater misericordiae,
Cum iudicare veneris,
Tunc parce nobis miseris.

Ad Tertiam.

1. Iesus nudatur vestibus
Columnae strictus fortius,
Flagellis dire caeditur
Et sanguine perfunditur.

2. Purpura induitur,
Capite spina pungitur,
Flexo genu illuditur
Et alapis adfligitur.

3. Tunc facie conspuitur,
Arundine percutitur,
A gentibus sic spernitur
Et crucifigi petitur.

4. Te, bone Iesu, petimus,
Ut nobis sis propitius,
Et per has contumelias
Nos duc ad sedes caelicas.

Ad Sextam,

1. Data mortis sententia
Iesus mente promptissima
Crucem portat in humeris
Immolandus pro miseris.

2. Hinc poenose exuitur,
Crudeliter distenditur,
Pedibus, palmis (per)foditur,
Clavis sic crucifigitur.

3. Suspensus cum latronibus
Orat pro confixoribus,
Salutis fluunt flumina
Per vulnera sanctissima.

4. Tunc titulus inscribitur,
Ludibriis afficitur,
Maternum cor adfligitur,
Vatis cultro transfigitur.

5. Honor et benedictio
Sit crucifixo Domino,
Qui suo nos supplicio
Redemit ab exitio.

Ad Nonam.

1. Pendens in cruce Dominus,
Fons vitae praedulcissimus,
Hac hora dicens "sitio"
Acetum, fel fit potio.

2. Tunc consummatis omnibus
Redemptionis actibus
Clamans emisit spiritum,
Mundum sic salvans perditum.

3. Expavescunt caelestia,
Contremiscunt terrestria,
Sua potenter anima
Vadit praedari tartara.

4. Latus perforat lancea,
Sanguis emanat et aqua,
Quae sacra stillicidia
Dant vitae beneficia.

5. Laus, honor Christo Domino,
Nos lavans fonte profluo,
Passo mortem pro populo
In aspero patibulo.

Ad Vesperas.

1. Nostrae salutis hostia
In ara crucis torrida,
Devicto mortis stimulo
Deponitur patibulo.

2. In passione Domini,
Qua datur salus homini,
Sit nostrum refrigerium
Et cordis desiderium.

3. Portemus in memoria
Poenas et opprobria,
Christi coronam spineam,
Crucem, clavos et lanceam.

4. Et plagas sacratissimas,
Omni laude dignissimas,
Acetum, fel, arundinem,
Mortis amaritudinem.

5. Haec omnia nos satient
Et dulciter inebrient,
Nos repleant virtutibus
Et gloriosis fructibus.

6. Te crucifixum colimus,
Te toto corde poscimus,
Ut nos sanctorum coetibus
Coniungas in caelestibus.

Ad Completorium.

1. Post cursum tandem temporis
Passionis et operis
Conditus aromatibus
Sepultus est a fratribus.

2. Qui iacuisti mortuus
In petra, rex innocuus,
Fac nos in te quiescere
Semperque laudes reddere.

3. Sucurre nobis, Domine,
Quos redemisti sanguine,
Sub crucis tuae tegmine
Nostrae salventur animae.

4. Guberna nos salubriter
Continuaque feliciter,
Ut veniam et gratiam
Consequamur et gloriam.

5. Laus tibi infinities,

Pro omnibus, qui passus es,
Perduc nos ad caelestia
Aeternae pacis gaudia.