22. Horae de Passione Domini.
Ad Matutinum.

1. Gloria tibi, Domine,
Qui tuo sacras lumine
Tempora noctis mediae,
Natus de pura virgine.

2. In nocte tribus vicibus
Ad patrem flexis genibus
Precem effundis supplicem
Pavensque sudas sanguinem.

3. A Iuda nocte traditus,
Osculi signo proditus,
Comprebensus ab impiis
Duris ligaris vinculis.

4. O Dei sapientia,

Quam benigna clementia,
Bonus male tractatus es,
Dignus indigna passus es.

5. Nostrae noctis caligine
Obtenebratus, Domine,
Tu nostra taetra limina,
Diei lux, illumina.

6. Nocte venturus media
In tuba archangelica
Fac nos accensa lampade
Digne tibi occurrere.

7. O lux misericordiae,
O rex aeternae gloriae,
De nocte nos miseriae
Tranfer ad lucem gloriae.

8. Laus tibi, rex clementiae,
Qui captus es hoc tempore,
Cum patre et paraclito
Perenni manens gaudio.

Ad Primam.

1. Gloria tibi, Domine,

Qui primae horae tempore
Homo factus es impotens,
Manens Deus omnipotens.

2. O diei diluculum,

Quam indignum spectaculum
Dignatus es pro homine
Fieri, Deus, Domine.

3. Tu rex regum spectabilis,
Totus desiderabilis,
Per multum es ludibrium
Nimis factus opprobrium.

4. Assistens iudicio,
Addiceris supplicio,
Palmis caesus sacrilegis,
Os ut agnus non aperis.

5. Innocens criminatus es,
Veste ludificatus es,
Consputus, flagellatus es
Ac spinis coronatus es.

6. Iniuste iudicatus es,
Qui iustus ipse iudex es,
Te ipsum exinaniens
Mitis exstas et patiens.

7. O rex potens institiae,
Deus totius gratiae,
Cum iudicare veneris,
Tunc parce nobis miseris.

8. Decus honor et gaudium
Sit tibi regi omnium
In trinitatis nomine,
Qui passus es hoc tempore.

Ad Tertiam.

1. Gloria tibi, Domine,
Qui tertiae horae tempore
Crucis sumis sententiam
Et hoc ad nostram gloriam.

2. Ad mortem crucis factus es
Deo patri oboediens,
Cum immolatus agnus es
Et ad victimam ductus es.

3. Tu mansuetus, humilis
Propriis gestabas umeris
Tuae crucis patibulum
Sacrans vitae mysterium.

4. Haec tua contumelia
Sit nostra semper gloria,
Fac nos ferre tuam crucem
Et te sequi vitae ducem.

5. Spiritus sancti gratia,
Hora diei tertia
Quae Domini discipulis
Venit in linguis igneis,

6. Ad nos dignanter veniat
Et corda nostra repleat,
Mala clemens amoveat
Et bona large tribuat.

7. Sit solamen continuum,
Sit tutamen perpetuum,
Salutis det consilium,
Virtutis det auxilium.

8. Sit laus patri cum filio,
Sancto simul paraclito,
Nobisque mittat filius
Charisma sancti spiritus.

Ad Sextam.

1. Gloria tibi, Domine,
Qui sextae horae tempore
Vestibus spoliatus es
Et in cruce levatus es.

2. In cruce tendis brachia
Et ad te trahis omnia,
Bonus pastor et optimus
Te impendis pro ovibus.

3. Quam dura, quam crudelia,
Sed nobis salutaria
Sunt sancta confixoria,
Quae pungunt membra regia.

4. Ex tuis innocentibus
Manibus atque pedibus
Vulnera sacratissima
Stillant salutis flumina.

5. Summus caelorum Dominus
Latronum pendens medius,
Oras pro confixoribus,
Redemptis esto propitius.

6. Rex Iudaeorum scriptus es
Et rex noster effectus es,
Semper in omni gratia
Nobis, precamur, impera.

7. Passionis remedium
Fac nobis salutiferum,
Tui sanguinis pretium
Nos salvet in perpetuum.

8. Tibi laus sit perpetua,
Qui passus es innumera
Cum patre ac spiramine
In summo caeli culmine.

Ad Nonam.

1. Gloria tibi, Domine,
Qui nonae horae tempore
Per multam abundantiam
Latroni praestas gratiam.

2. Iohannem dilectissimum
Custodem das virgineum
Sanctae virgini virginum,
Quae te genuit filium.

3. Gustans amaritudinem
Dona vitae dulcedinem,
Mortem solvens indebitam
Nostram sustolle debitam.

4. Expasvescunt caelestia,
Contremiscunt terrestria,
Deo patri sanctissimum
Cum commendasti spiritum.

5. O salvatoris anima
Pia et benignissima,
Nostras migrantes animas
In aevum salvas facias.

6. Sit tua crucifixio

Nostra, Christe, redemptio,
Sit crucis consignatio
Aeterna benedictio.

7. Latus apertum lancea
Sanguine manat et aqua,
Quae sacra stillicidia
Dent vitae beneficia.

8. Decora nunc laudatio
Sit tibi Dei filio,
Qui factus es redemptio,
Cum patre et paraclito.

Ad Vesperas.

1. Gloria tibi, Domine,
Qui, cum cenares vespere,
Discipulis vivifica
Tua dedisti mysteria.

2. Tu pro nobis vespertinum
Factus es sacrificium,
Immaculata hostia
In ara crucis torrida.

3. Quanta lamenta flentium,
Te Christe diligentium,
Tuas plagas cernentium
Et in te confidentium.

4. Inter quas praecipua
Mater erat virginea,
Doloris immanissimus
Quam pertransivit gladius.

5. O Iesu Christe Domine,
Qui tanta es pro homine
Passus in tuo corpore,
Nos miseratus refove.

6. Magnus omnipotentia,
Sed maximus clementia,
Tua exinanitio
Nostra sit exaltatio.

7. Nos protegas ac munias
Et saluti restituas,
Animas atque corpora
Salvando beatifica.

8. Tibi regi altissimo
Laus sit et benedictio,
Qui per mortem asperrimam
Supernam reddis patriam.

Ad Completorium.

1. Gloria tibi, Domine,
Qui iam completo opere
Salutis atque gratiae
Triumpho polles gloriae.

2. A Ioseph et Nicodemo
Depositus patibulo,
Conditus aromatibus
Es in sepulcro positus.

3. Tua potenter anima
Vadit praedari tartara,
Imperavit divinitas
Ac salvavit humanitas.

4. Ut nostrae nunquam animae
Morti fiant obnoxiae,
Nec hostis malignus rapiat,
Tua manus eripiat.

5. Nec nos a te destituas,
Sed ad regnum restituas,
Tua sumus adoptio,
Tua samus redemptio.

6. Tremenda die ultima,
Cum simul pavent omnia,
Tunc tuam dulcem faciem
Nobis ostende placabilem.

7. In manu tua, Domine,
Simus in omni tempore,
Nos consumma feliciter
Nos salvos fac perenniter.

8. Laus tibi, bone Domine,
Qui humana custodia
Munitus es hoc tempore
Potenter vivens numine.