28. Horae de Passione Domini.

Ad Matutinum.

Ave, verbum summi patris,

Flos et fractus castae matris,

Pie Iesu Nazarene,

Mitis, clemens et serene,

5. Qui in hora matutina,

Ut me reum a sentina

Peccatorum emundares,

Tuo patri reformares,

Gravi turba te vallante

10. Ac te Iuda osculante

Capi, trahi ac ligari

Atque sputo maculari

A Iudaeis voluisti,

Patienter et tulisti,

15. Quando Petrum te negantem

Suscepisti lacrimantem ;

Meas, precor, sume preces,

Delictorum terge faeces

Et da fontem lacrimarum,

20. O redemptor animarum,

Ut in corde sic contrito

Caritatis et ignito

Tibi merear servire,

Tuis iussis oboedire.

25. O Iesu, precor, vendite,

Mundi redemptor inclite,

Tua morte pro amara,

Quam tulisti, crucis ara

In tuo sacro corpore,

30. Succurre mortis tempore.

Ad Primam.

Ave, verbum incarnatum,

Ex Maria procreatum,

Christe, fili magni regis,

Consecrator novae legis,

5. Cui diei hora prima,

Ut me reum ad sublima

Revocares supernorum,

Mox a turbis Iudaeorum

Ducebaris ad Pilatum,

10. Scelerosum et elatum,

Pia facie velatus,

Ab iniquis accusatus,

Flexis illusus genibus,

Colaphizatus ictibus,

15. Sacris manibus ligatus,

Licet innocens fuisti,

Ut mutus tamen tacuisti;

Unde, precor, vitae dator,

Gravis licet sim peccator,

20. Me perfunde caeli rore,

Ut te duce, te rectore

Hostes queam superare

Et ardenter te amare.

Ad Tertiam.

Ave, princeps verae pacis,

Qui credentes salvos facis

In te, Iesu, agne Dei,

Fili matris sanctae spei,

5. Tu, qui in hora tertia

Multa ferens opprobria

Coram plebe et Pilato,

Ut me mundares a peccato,

Exstitisti praesentatus,

10. Illudendus, spoliatus,

Ad columnam flagellatus

Et ad mortem condemnatus,

Quique vestitus purpura

Coronatus atque spina,

15. Caput caesum arundine,

Vultus perfusus sanguine

Ut leprosus tu stetisti,

Crucem in umeris tulisti,

Facme,quaeso, te sequi ducem,

20. Paenitendo ferre crucem,

Ut in extremo tempore,

Dum resurgam in corpore,

Me digneris excusare,

Patris iram mitigare.

Ad Sextam.

Ave, caeli reserator,

Peccatorum reformator,

Alme Iesu, fons amoris,

Orbis nate conditoris,

5. Hora sexta qui diei

Tamquam ovis causa mei

Tu innocens et patiens

Urbis portam egrediens

Nudus cruci es adfixus,

10. Post erectus sic distentus,

A Iudaeis es contemptus.

Qui latronem confitentem

Suscepisti paeniteniem,

Meas preces, precor, audi,

15. Christe clemens, et exaudi.

Fac peccata me deflere,

Morti tuae condolere,

Ne me damnes pro delicto

In iudicio districto,

20. Sed te iuvante libere

Merear evadere

Iudicium ultionis

Causa tuae passionis.

Ad Nonam.

Ave, crucis consecrator,

Christe, pacis reparator,

Dulcis fructus sanitatis

Et amator castitatis,

5. Qui diei hora nona

Humanatus in persona

Pro me pendens crucis ara

Vulneratus in amara,

A Iudaeis blasphematus

10. Et opprobriis saturatus,

Iussu patris qui completo

Fel potasti cum aceto

Et inclinato capite,

O redemptor inclite,

15. Patri spiritum tradidisti,

Sic me lapsum redemisti.

Heu quantam, Christe, gratiam

Perdidi per malitiam,

Culpis licet sim gravatus,

20. Morte tua me mercatus

Es, caelestis agne Dei,

Miserere, precor, mei,

Redde misericorditer,

Quod perdidi fragiliter.

Ad Vesperas.

Ave, panis angelorum,

Nutrimentum conditorum,

Bone Iesu, leo fortis

Et aeternae victor mortis,

5. Qui in hora vespertina

Matre stante in vicina

De ligno crucis levatus,

In sinu matris collocatus.

Plena erat tristitiae,

10. Mater solis iustitiae,

Cuius ensis cor transfixit,

Senex Simeon quod praedixit,

Unde, precor, verbum patris,

Per dolorem tuae matris,

15. Quem in corde sustinuit,

Dum te in sinu tenuit,

Praesta locum paenitendi,

Nam in multis te offendi,

Mea ut plangam scelera

20. Per tua quinque vulnera,

Da devota ut in mente,

Puro corde te favente

Vitam meam, Iesu care,

Fine bono consummare.

Ad Completorium.

Ave, lumen veritatis,

Vas insigne deitatis,

Sacer Iesu, vita vera,

Hostia sacra, lux sincera,

5. Hora diei ultima

Qui pro morte turpissima,

Quam passurum te scivisti,

Guttas sanguinis fudisti.

Corpus tuum perforatum

10. A Iudaeis et necatum

In sepulcro dum quievit,

Quam amare mater flevit;

Huius fletus memorare,

Quaeso, Christe, splendor clare,

15. Per amaram tuam mortem

Fac sanctorum me consortem,

Ut instante die mortis,

Rex aeterne, iudex fortis,

Me digneris visitare,

20. Mortis horam nuntiare,

Ut spe firma, fide recta

Caritateque perfecta

In te queam exspirare,

Semper tecum exsultare.