29. Horae de Passione Domini.

Ad Matutinum.

1. Iesus orans intime

mente contristatur,

Iesus sudat sanguinem,

terra madidatur.

2. Iesus vili pretio

venditur Iudaeis,

Iesus Iudae osculo

traditus est eis.

3. Iesus sponte capitur,

viliter tractatur,

Iesus duris vinculis

fortiter ligatur.

4. Iesus a discipulis

fuit derelictus,

Iesus ductus turpiter

opprobriis afflictus.

5. Iesus Annae primitus

fuit praesentatus,

Iesus a discipulis

fuit ter negatus.

6. Iesus manu servuli

fuit alapatus,

Iesus vinctus Caiphae

fuit praesentatus.

7. Iesus falsis testibus

fuit accusatus,

Iesus de blasphemia

fuit inculpatus.

8. Iesus diffinitus est,

quod sit mortis reus,

Iesus duris colaphis

punitur homo Deus.

9. Iesus infidelium

sputis defoedatur,

Iesus palmis perfidis

vultu verberatur.

10. Iesu laetam faciem

coeperant obvelare,

Iesum impiissimi

iusserunt prophetare.

Ad Primam.

1. Iesus ad praetorium

Pilato praesentatur,

Iesus multo crimine

ibidem accusatur.

2. Iesus regi mittitur,

qui congratulatur,

Iesum rex interrogat,

responsum nullum datur.

3. Iesus multo scelere

constanter accusatur,

Iesus cum nil diceret,

a cunctis aspernatur.

4. Iesus tunc ironice

albis est vestitus,

Iesus Pilato redditus

receptus est invitus.

Ad Tertiam.

1. Iesus morti traditur,

latro liberatur,

Iesus veste propria

flebiliter nudatur.

2. Iesus flagris caeditur

fortiter ligatus,

Iesus est purpurea

veste subsannatus.

3. Iesu caput inclitum

spinis contorquetur,

Iesus arundineo

sceptro irridetur.

4. Iesus flexis genibus

false adoratur,

Iesus a militibus

Pilati alapatur.

5. Iesu laetam faciem

sputis maculabant,

Iesu caput innocens

cum canna verberabant.

6. Iesus spretus turpiter

Iudaeis demonstratur,

Iesum tolli clamitant,

ut cruci suspendatur.

Ad Sextam.

1. Iesus tribunalibus

Pilato praesentatur,

Iesus per sententiam

mortis condemnatur.

2. Iesus crucem propriam

in umeris portavit,

Iesus locum Golgathae

poenaliter intravit.

3. Iesus suis vestibus

cunctis spoliatur,

Iesus membris omnibus

in cruce dilatatur.

4. Iesu manum dexteram

clavus perforavit,

Iesu laevam carnifex

dire conclavavit.

5. Iesus pede dextero

vulnus capiebat,

Iesus pede altero

ex vulnere dolebat.

6. Iesus cruce positus

in alium elevatur,

Iesus cum latronibus

pendens deputatur.

7. Iesu vestes inclitae

sorte dividuntur,

Iesu regales tituli

a iudice scribuntur.

8. Iesus in patibulo

crucis exprobratur,

Iesus a latronibus

tunc convitiatur.

9. Iesus matris intime

compassus est dolori,

Iesus hanc discipuli

dat curae et amori.

Ad Nonam.

1. Iesus patri caelico

relinqui se clamavit,

Iesus dicens ''sitio

''acetum, fel potavit.

2. Iesus ''consummatum est

''alte personavit,

Iesus patri spiritum

exspirans commendavit.

3. Iesu latus lancea

miles perforavit,

Iesus nobis sanguinem

cum aqua propinavit.

Ad Vesperas.

1. Iesus de cruce ponitur

hora vespertina,

Iesus murra unguitur,

vitae medicina.

2. Iesus pannis volvitur,

latet vis divina,

Iesus, mundi gloria,

iacuit in spina.

Ad Completorium.

1. Iesus completorii

hora tumulatur,

Iesus specu clauditur,

a suis lamentatur.

2. Iesus limbum spolians

caelos reseravit,

Iesus olim perditam

ovem reparavit.

3. Iesu, pie Domine,

munus de passione,

Christe, tibi offero

cordis devotione.

4. Iesu, cordis gaudium,

o salvator boue,

Iesu, nos participes

tuae fac coronae.

Conclusio

per modum orationis.

1. Iesu, fons dulcedinis,

da copiam amoris,

Nostro cordi imprime

tui vim doloris.

2. Iesu, mores corrige

vitam tribuendo,

Hostes nostros comprime

pacem largiendo.

3. Iesu, nos ad patriam

duc aeternitatis

Et nos fac participes

divinae claritatis.