30. Horae de Passione Domini.

Ad Matutinum.

1. Ad Matutinum gemide

Tu patrem exorasti,

Qui prae maerore tremide

Cruorem sudasti,

2. Recumbens in angustia

In monte olivarum

Cum tristi querimonia

Instantium poenarum.

3. Ast interim cum facibus

Iudaei venientes

Et gladiis minacibus

Te propere quaerentes,

4. Per osculum miserrimi

Te Iudae cognoverunt,

Te servi sed asperrimi

Ligantes abduxerunt

5. Apostolis timentibus

Saevitiam cohortis

Atque fugientibus

Timore dirae mortis.

6. Hinc coram pontificibus

Fuisti praesentatus,

In causis multiplicibus

Non minus accusatus

7. Per testes iniquissimos

omni modo mendaces,

Et viros per nequissimos

Et nimium procaces.

8. In collo tuo caesus es,

In roseis maxillis,

Percussus atque laesus es

Cum palmis et pugillis.

9. Tis faciem sputamine

Iudaei maculantes,

Cum albo linteamine

Etiam velantes,

10. Te multum derisorie

Caedendo verberarunt,

Te valde despectorie

Calcando subsannarunt.

11. Petrum tribus te vicibus

Negantem audivisti,

A diris carnificibus

Illusus dum fuisti,

12. Haec horrida convicia

Tu quia sustulisti

Et alia supplicia,

Quibus nos redemisti.

Ad Primam.

1. Ad primam praesentatus es

Tu praesidi Pilato,

De quo iam destinatus es

Herodi scelerato,

2. Sed et hic, sua contio

Te, proh dolor, irrisit,

In alba veste Pontio

Pilato te remisit.

3. Qui quidem multifarie

Te iam examinavit

Immunem et a carie

Te fore proclamavit.

4. Verumtamen instantibus

Nequissimis Iudaeis

Te multum accusantibus

Assentit hic et eis.

5. Nam Barrabam redemerant,

Ad statuam ligarunt,

Flagellis corpus foderant,

Dire castigarunt.

6. Post clamydem coccineam

Te supervestientes

Atque in caput spineam

Coronam imprimentes

7. Arundinem in manibus

Hinc tibi tribuerunt

Et verbis cum minacibus

Illudere coeperunt.

8. Nam iuvenes cum senibus

Furentium tortorum

Clamabant flexis genibus:

Ave, rex Iudaeorum.

9. Qui caput, heu, spiniferum

Hinc tuum verberarunt

Arundine mortiferum

Et ictum replicarunt.

10. Ut cruor ab acumine

Spinarum emanaret

Et rubicundo flumine

Te prorsus irrigaret.

Ad Tertiam.

1, Ad tertiam nequissimus

Ab aequitate cedens

Pilatus, atrocissimus

Pro tribunali sedens,

2. Iniquam per sententiam

Te mori iudicavit,

Qui tuam innocentiam

Iniuste condemnavit.

3. Amicis tuis flentibus

Iudicium tam durum

Tuumque deplangentibus

Supplicium futurum.

4. Hinc saevis carnificibus

Fuisti derelictus,

A quibus multiplicibus

Es cladibus adflictus.

5. Qui crucem tuis umeris

Gerendam tunc viderunt,

Conviciis innumeris

Te quidem affecerunt.

6. Nam geminis praedonibus

Fuisti sociatus,

Praesertim cum latronibus

Iniquis reputatus.

7. Te sequebatur flentium

Caterva matronarum

Et tuum deplangentium

Dolorem tam amarum

8. Ad locum despectissimum

Calvariae vocatum,

Exosum, dedignissimum,

Latronibus aptatum.

9. Ubi secundario

Milites te nudabant

Et flagra tua vario

Tormento renovabant,

10. Iam tuum coaequaliter

Vestitum dividentes

Et partes socialiter

Ex eis capientes.

Ad Sextam.

1. Ad sextam cum funiculis

Extensus es in cruce

Et fixus cum claviculis

A gente nimis truce

2. Per poenas ineffabiles

Per palmas sacrosanctas,

Sicut per venerabiles

Etiam tuas plantas,

3. Ut tua caro regia

Sit quasi lacerata,

Cum tua praeegregia

Sint membra numerata.

4. Hinc supra epitaphium

Pilatus cruci fixit,

Per tripartitum graphium

Conscriptum, quo edixit:

5. Hic Iesus Nazarenus,

Rex verus Iudaeorum,

Regale cui est genus

De stirpe proavorum.

6. O vere dolor nimius,

Cum omnes tui cari

Viderunt te sublimius

In cruce sublevari.

7. Tunc sese dilataverant

Clavorum fixurac

Et sanguinem stillaverant

Pedes manusque purae.

8. Sed inter haec supplicia,

Quae valde te gravabant,

Multimoda convicia

Iudaei tibi dabant,

9. Dicentes: aegrotarios

Hic multos sanos fecit

Atque languentes varios,

Nunc sibimet defecit.

10. Non minus inculpaverat

Te latro sinistrinus,

E contra reprobraverat

Hunc latro dexterinus.

11. Unius obloquentiam

Benigne sustulisti,

Alius paenitentiam

Condigne suscepisti.

12. In rupe Calvariae

Tu matrem prope stantem,

Carentem omni carie,

Vidisti lacrimantem.

13. Hanc tuo consanguineo,

Quem mere dilexisti,

Discipulo virgineo

Iohanni commisisti.

Ad Nonam.

1. Ad nonam "ego sitio"

Clamasti, Iesu bone,

Prae nimio supplicio

Cum esses in agone.

2. Gens mala tibi tribuit

Potare fel amarum

Per spongiam, sed libuit

Hoc bibere te parum,

3. Dicendo: Consummatum est,

De passione mea

Quod ante prophetatum est

Per vates in Iudaea.

4. Hinc tuis pro tortoribus

Patrem exoravisti,

Pro tuis derisoribus

Cum lacrimis dixisti:

5. His, pater amantissime,

Dimitte, qui me plagant

Et cruciant gravissime,

Cum nesciant, quid agant.

6. Me tuum quare filium

Liquisti, heli, heli?

Hoc mortis est exsilium,

Plasmator alme caeli.

7. En, morior pro homine

De morte redimendo,

In manus tuas, Domine,

Spiritum commendo.

8. Sic poenis in gravissimis

Pendens clamitasti

Altisonis cum vocibus,

Cum vitam exhalasti.

Ad Vesperam.

1. Ad vesperam aromata

Vir Ioseph Deo carus

Et Nicodemus, grammata

Qui novit legis gnarus,

2. Discipulorum nomine

Private se gerentes

Tibique, Christe Domine,

Sincere condolentes,

3. Audacter tunc intraverunt

Ad iudicem Pilatum

Et tuum impetraverunt

Corpusculum beatum.

4. Cum quibus secundarie

Tortores abierunt

Et ad locum Calvariae

Te mortuum viderant.

5. Quapropter grex carnificum

Os tibi non confregit,

Longinus sed deificum

Tuum latus impegit

6. Cum lancea gravissima,

Qua cruor emanavit,

Cum aqua limpidissima

Quae nos a noxa lavit.

7. Per sanguinem sacerrimum

Rigasti crucis postem,

Quo zabulum asperrimum

Necasti nobis hostem.

8. Nam agnus absque macula

Tu es praefiguratus,

Qui diluis piacula

In pascha consecratus.

9. Extractis hinc claviculis

Fuisti resolutus

Et lineis panniculis

Dignanter involutus

10. Pro tuis funeralibus,

Quae Ioseph comparavit,

Expensis qui magnalibus

Exsequias paravit.

Ad Completorium.

1. Ad horam completorii

Fuisti deportatus

Ad specum promontorii,

Ibidem tumulatus,

2. In candido sudario

Gratifice consutus

Aromate cum vario

Condigne delibutus.

3. Ex murrae mixturamine

Et aloes conditus

Cum mundo linteamine

Decenter investitus.

4. Hinc lapidem eximium

Discipuli volverunt

Et monumentum nimium

Bene obstruxerunt.

5. Plangentes suum dominum

Te, mundi redemptorem,

Salvantem genus hominum

Ob maximum amorem.

6. In terra sanctissimae,

Salvator Iesu bone,

Tam virgines clarissimae

Quam nobiles matronae

7. Sederunt cum maestitia

Cis tuum monumentum

In cordis amantia

Fundentes, heu, lamentum

8. Cum domina sacerrima,

Maria gloriosa,

Benigna, praepulcherrima,

Praedigna, praeformosa.

9. Quae fletibus rigaverat,

Heu, virginalem vultum

Gremendoque spiraverat

Continue singultum.

10. Haec mater vere nobilis

Sepulcro cohaerebat

Et permanens immobilis

Cum fletibus tunc flebat.

11. O quanta desolatio

Tis matrem tunc affecit,

Eidem consolatio

Nam utique defecit,

12. Dum haec cum violentia

De tumba traheretur,

Amabili praesentia

Sic tua privaretur.

13. Sic flebiles exsequiae

Fuerunt adimpletae,

In tua sancta requie

Sunt horae iam completae.

A d Matutinum.

1. Aeterno regi gloriae

Devota laudum cantica

Fideles solvant hodie

Pro corona dominica.

2. Coronat regem omnium

Corona contumeliae,

Cuius nobis opprobrium

Coronam confert gloriae.

Ad Laudes.

1. De spinarum aculeis

Christi corona plectitur,

Qua ministris tartareis

Mundi potestas tollitur.

2. Corona Christi capitis,

Sacro perfusa sanguine,

Poenae solutis debitis

Reos purgat a crimine.

Ad Primam.

1. Iam lucis mundi conditor

Impiissime tractatur,

Conspuitur, illuditur,

Postremum flagellatur.

2. Corona de spinis plectitur,

Qua caput Christi pungitur,

Punctum dedit medicinam

Et gloriam sempiternam.

Ad Tertiam.

1. Nunc sanctus pater omnium

A Pilato damnatur,

Corona infidelium

Spinea coronatur.

2. Hunc summam regem gloriae,

Spinis coronatum,

Deridet plebs perfidiae

Morte condemnatum.

Ad Sextam.

1. Rector potens, verax Deus,

Se permisit coronari,

Ut redemptor esset verus,

Tam vilis voluit reputari.

2. O quam felix punctio,

Quam beata spina,

De qua fluxit unctio,

Mundi medicina.

Ad Nonam.

1. Rerum Deus aculeis

Spinarum transfoditur,

Vultus rubet sanguineis

Guttis, et sub bis moritur.

2. Pungens spina vulnerat

Christum patientem

Et a morte liberat

Populum credentem.

Ad Vesperas.

1. Ave, lumen saeculi,

Sub spinis quod coronae

Stas infidelis populi,

A mortis me solve mucrone.

2. Spinae rubent sanguine

Christum cruentantes,

Mundum lavant crimine

Caelum reserantes.

Ad Completorium.

1. Fit porta caeli patula,

Spinea dum corona

Caput Christi pungitur,

Et effluunt caelica dona.

2. Genus omne saeculi,

Laudes solve debitas

Spineae coronae Domini,

Quae abluit nostras noxas.

3. Laus Christo, regi gloriae,

Pro coronae virtutibus,

Qua nos reformans gratiae

Coronat in caelestibus.