33. Horae de Resurrectione Domini.

Ad Matutinum.

1. Salve, nox sacratissima,
Quam diligere est iustitia,
Sensus mortalis hominis
Non valet comprehendere
Te suavem in tuo lumine.

2. O nox beatissima,
Omni plena laetitia,
Expellens tua dignitas
Omnes tenebras noxias.

3. Qui humano in corpore
Multa tulit pro homine,
Ad eruendum properat,
Quem liberare venerat.

4. Ornatum quondam angelum
Ligat nunc diabolum,
Ut hominem restituat,
Quem de limo plasmaverat.

5. Gloria tibi, Domine,
Qui virtute potentiae
Ab omni tristitia
Liberasti hac nocte tua opera.

Ad Primam.

1. Iam illuxit divinitus
Dies ille dulcissimus,
Quem Christus, sol iustitiae,
Consecravit praecipue,
Qui optatus est perenniter
Et donatus feliciter.

2. Huius diei sollemnitas
Est aeterna suavitas,
Vincit mellis dulcedinem
Et dat omne gaudium.

3. Mater et virgo nobilis,
Quae viro est incognita,
Iam videt suum filium,
Quem luxit nimis mortuum.

4. Eius congaudet victoriae,
Quam sic peregit optime,
Quod mortem vicit viriliter
Et vivit aeternaliter.

5. Quis illa ineffabilia
Pensare posset gaudia,
Qua de filii dulci praesentia
Laetatur mater unica,
Quae illum ut propriam
Nimis dilexit animam.

6. Quaesumus, auctor omnium,
In hoc paschali gaudio
Ab omni mortis impetu
Tuum defendas populum.

7. Gloria tibi, Domine,
Qui surrexisti a mortuis,
Cum patre et sancto spiritu
In sempiterna saecula.

Ad Tertiam.

1. Nunc rimante spiritu
Celebremus insignia
Huius diei gaudia
Et indefesso corpore
Laudemus regem gloriae.

2. Gaude simul, ecclesia,
Superna quoque curia,
Plaude iucundis manibus
Excelsis cum ordinibus.

3. Agnus mansuetissimus
Est leo factus fortissimus,
Dum suis subiecit pedibus,
Qui nos devicit fraudibus.

4. Quaesumus, auctor omnium,
In hoc paschali gaudio
Ab omni mortis impetu
Tuum defende populum.

5. Gloria tibi, Domine,
Qui surrexisti a mortuis,
Cum patre et sancto spiritu
In sempiterna saecula.

Ad Sextam.

1. Hector potentissimus,

Qui vultu est pulcherrimus,
In se ipso renituit,
Dum de morte convaluit.

2. Superna illa divinitas,
Quae est summa suavitas,
Exsurge, ait, mea gloria;
Caro respondit te tumulo:
Exsurgam diluculo.

3. Horam illius dulcedinis
Non valet homo fragilis
Vel parum intellegere,
Quantae fuerit gloriae.

4. Quanta fuit suavitas,
Quod summa divinitas
In terris tota pleniter
Habitavit ineffabiliter.

5. De hac tanta dulcedine
Infundantur hodie,
Ut corde devotissimo
Serviamus Domino.

A d Nonam.

1. Serum Deus inclite

Nos caelestium vere protege,
Ut in tua dilectione
Ferveamus assidue.

2. Qui triumphali potentia
Claustra destruxisti infernalia,
Nos ad vitae gaudia
Per festa duc paschalia.

3. Quanta et quali gloria
Praecedebas ad tartara,
Cum te senatus angelicus
Praecessit ut regem nuntius.

4. O quam pulchra processio,
Ornata omni gaudio,
Quae vexillis niveis
Exibat de tenebris!

O laudandum per saecula,
Per quem fit haec victoria.

Ad Vesperas.

1. Salve, dies sanctitatis
Simul et iucunditatis,
Haec est excelsior cunctis
Sanctiorque universis.

2. Salve, dies miserationis
Totiusque liberationis,
Vivis qui es gaudium,
Defunctis refrigerium.

3. Salve, dies decora et praeclara,
Angelis et hominibus cara,
In qua nos salvator mundi
A morte aeternae
Maledictionis redemit
Et planctum nostrum
In gaudium convertit.

4. Salve, dies festa,

In qua consolantur corda maesta,

Cunctis vivis et defunctis grata

Quia in ipso omnium

Artata sunt peccata.
5. Salve, gloria dierum,

In qua dominus caelorum

Hodie in paradisum

Restituit hominem reum.

6. Huic sanctissimas diei
Collaetentur omnes iusti et rei,
Et regina caeli
Laudem pangat filio Dei
Cum sexu femineo,

7. Congaudeat in hac sacra die
Unico specioso filio regnanti,
Contempletur ovans luce,
Quem morientem vidit in cruce.

8. Laudent te omnes angeli et
archangeli,
Omnes sancti et iusti,
Quia hodie eorum
Numerum adimplesti.

9. Laudent te omnes sancti
Patriarchae et prophetae,
Quia hodie eorum numerum
Visitasti et liberasti.

10. Laudent te omnes sancti
Et electi tui,

Quos per resurrectionem tuam
Ad vitam aeternam reparasti.
Et nos peccatores te laudamus
Gratias agentes

Suppliciterque deprecantes,
Ut in eorum consortio
Te in perpetuum
Laudare mereamur.

Ad Completorium.

1. Laudandas est Dominus,
Qui divinitatis viribus
Hostem humani generis
Spoliavit in inferis.

2. O laudanda victoria,
Quia illa dulcissima
Anima se circumdedit
Et divinitate armavit.

3. O quantus clamor oritur,
Dum manus illa porrigitur,
Quae suam ad imaginem
Plasmaverat tunc hominem.

4. Et quem irata facie
Quaerebat in meridie,
Eum nunc non quaeritat,
Sed ut placatum videat.

5. Ille resolutus in lacrimis
Obviam ei clamitat:
Nunc advenisti, Domine,
Quem nos diutissime
Nostris uberrimis
Exspectavimus lacrimis.

6. Quaesumus, auctor omnium
In hoc paschali gaudio
Ab omni mortis impetu
Tuum defende populum.

7. Gloria tibi, Domine,
Qui surrexisti a mortuis,
Cum patre et sancto spiritu
In sempiterna saecula.