34. Cursus de sanctis Angelis.

Ad Matutinum.

1. O Serapium ignivoma

Et Cherubim aetherea

Divinaque subsellia,

Numina dominantia,

2. Sidera principantia

Potestasque almiphona,

Virtus quoque uranica

Et phalanx archangelica,

3. Beata plebs angelica,

Cuncta superna agmina,

Laus Deo pro vestra gloria,

Cui iungat nos ex gratia.

Ad Laudes.

1. Omnes caelestes ordines,

Caelestis aulae milites

Mille milleni millies,

Vestros audite supplices.

2. Potentes in virtutibus,

Tremendi quoque nutibus

Et fulgurosi vultibus,

Christi favete plebibus.

3. Salve, beata trinitas,

Simul et una deitas,

Iuva creatrix saeculum,

Quae regnas in perpetuum.

Ad Primam.

1. Patrone fidelissime

Custosque mi angelice

Ac propugnator optime,

Caeli consors militiae,

2. Tibi laudes magnificas

Et grates reddo debitas,

Tuae datum custodiae

Perduc in regnum patriae

3. Pro omni tua gloria

Et fida patrocinia

Sit sempiterno Domino

Laus fideli custodia.

Ad Tertiam.

1. O Michael, dux inclite,

Primas caeli militiae,

Qui clarior prae ceteris

In arce fulges aetheris.

2. Paradisi praeposite,

Christi princeps ecclesiae,

Agones nostros prospice,

Post mortem pius suscipe.

3. Doxa regi altissimo

In principe clarissimo,

Cuius nos forti brachio

Caeli coronet bravio.

Ad Sextam.

1. O viva caeli sidera

Et paradisi lilia,

Nobile decus patriae,

Dei gaudentes facie,

2. Sublimi vestrae gloriae

Congratulemur intime,

Cuius et nos participes

Vestros facite supplices.

3. Trinitati deificae

Laus, honor, decus latriae,

Creatis et spiritibus,

Quos beat in caelestibus.

Ad Nonam.

1. Laus angelorum inclita,

Spes conditorum unica,

Lumen Deus de lumine,

Tu nos ab alto respice.

2. Nostris quies sit mentibus

Angelorum precatibus,

Quorum piis concentibus

Nos iungas in caelestibus.

3. Te cuncta laudent pariter,

Summe cunctorum arbiter,

Est cuius regnum stabile

Per aevum sine tempore.

Ad Vesperas.

1. Chori novem angelici

Canori et hymnidici

Creatorem dulcisonis

Semper laudantes organis,

2. Apud ipsum causidici

Nostri sitis pacifici,

Ut mereamur adici

Melodis regni caelici.

3. Hinc laetabundis mentibus

Vobiscum summis civibus

Laudes Deo concinimus,

Ut det nos vestris coetibus.

Ad Completorium.

1. O angeli fortissimi

Ac victoriosissimi,

En, vestrae fortitudini

Hostes cedunt tartarei.

2. Pugnamus hic in stadio

Salutis desiderio,

Ferte nobis auxilia

Contra bella hostilia.

3. Salus, virtus, victoria

Deo nostro in saecula,

Qui robur dat pugnantibus,

Coronam triumphantibus.