38. De Conceptione BMV.

Invitatorium.

Eia, mea labia,

Nunc annuntiate

Laudes et praeconia

Virginis beatae.

Ad Matutinum.

1. Salve, mundi domina,

caelorum regina,

Salve, virgo virginum,

stella matutina,

Salve, plena gratia,

clara lux divina,

Meum in auxilium,

domina, festina.

2. Post imitatorium

tuum inchoatum

Submersum presbyterum,

Acheronti datum,

Inde pie eruis,

admones, ut statum

Mutans tuum celebret

conceptum beatum.

Ad Primam.

1. Salve, sapientiae

domus dedicata,

Columna septemplici

mire perornata,

Ab omni contagio

mundi praeservata,

Ante sancta in utero

parentis quam nata.

2. Ab aeterno Dominus

te praedestinavit

Matrem unigeniti

fore, qui creavit

Terram, pontum, aethera,

quam sic sublimavit,

Nulla culpa penitus

sibi subiugavit.

Ad Tertiam.

1. Salve arca foederis,

thronus Salomonis,

Arcas pulcher aetheris,

rubus visionis,

Virga frondens germinis,

vellus Gedeonis,

Porta clausa numinis,

expers livionis.

2. Decuit tam nobilem

natam praecavere

A culpas miseria

matrem suam vere,

Quam sibi elegerat

in matrem habere,

Nulli unquam velle [hanc]

labi subiacere.

Ad Sextam.

1. Salve, virgo virginum,

templum trinitatis,

Angelorum gaudium,

cella puritatis,

Solamen maerentium,

Hortus voluptatis,

Palma patientiae,

Cedrus castitatis.

2. Helsini navicula

undis agitatur,

A quo mox ut monito

caelitus iuratur,

Quod tua conceptio

devote colatur,

Aequor ad imperium

tuum mitigatur.

Ad Nonam.

1. Salve, urbs refugii

turrisque munita,

David propugnaculis

miris insignita,

Tu sponsato coniugem

ducente levita,

Nonam cum inciperet,

hunc affaris ita:

2. Numquid non pulcherrima

sum? dic ergo, quare

Me dimissa aliam

vis sponsam amare?

Noli hoc sic agere,

mihi famulare

Et hinc meum conceptum

cura celebrare.

Ad Vesperas.

1. Salve horologium,

quo retrogradatur

Phoebus decem lineis,

verbum incarnatur,

Ut homo ab inferis

ad summa venatur,

Immensus ab angelis

paulo minoratur.

2. Solis huius radiis,

domina, fugetur

Tetra nox, et acies

mentis illustretur.

Amorisque facibus

cor tepens flammetur,

Ut hunc pure diligat,

huic famuletur.

Ad Completorium.

1. Salve, virgo puerpera,

mater illibata,

Regina clementiae,

dulcis advocata,

Prae cunctis angelicis

choris ordinata

Et ad dextram filii

in regno locata.

2. Ad te, mater gratiae,

dulcis spes reorum,

Preces supplex dirigo,

ut regni caelorum

Adipisci merear

gaudia sanctorum,

Adiunctus splendiferis

choris angelorum.

Conclusio.

Supplices offerimus

tibi, mater pia,

Has horas canonicas,

tu nos in hac via

Ducas cursu prospero

et in agonia

Astes nobis exitus,

o dulcis Maria.