44. De Compassione BMV.

Ad Matutinum.

1. Consolatrix pauperum,

caelica regina,

Audit captum filium

hora matutina,

Gregem apostolicam

intellegit dispersum,

Sicque sibi gladium

sentit in cor mersum.

Ad Primam.

2. Hora prima conspicit,

qualiter Pilato

Iesum turba tradidit,

viro reprobato,

Cernens proli faciem

sputo maculatam

Ensis sentit aciem

in corde vibratam.

Ad Tertiam.

3. Cum advenit tertia,

videt coronatum

Spinis et sententia

prava condemnatum,

Virgis caesum intuens,

crucem baiulantem

Et mucronem sentiens

sese perforantem.

Ad Sextam.

4. Hora sexta filium

videt conclavari,

Inter duos medium

audit blasphemari,

Ex amaritudine

murratae potionis

Est in matre virgine

mucro Simeonis.

Ad Nonam.

5. Audit in meridie

vocem morientis,

Lanceam in latere

viderat pendentis,

Terrae motus, tenebrae,

quae tunc evenerunt,

Mariam in pectore

dire transfixerunt.

Ad Vesperas.

6. Cum de ligni nexibus

vespere movetur,

Maternis amplexibus

stringens intuetur,

Ungit, tergit vulnera,

flet et osculatur

Mater et in anima

sic transverberatur.

Ad Completorium.

7. Sepulturae deditum

occidente die

Magnum est supplicium

virgini Mariae,

Viva carens mortuo

mater benedicta

Est prophetae gladio

graviter adflicta.

Conclusio.

8. Hunc sermonem, domina,

tibi iam oblatum

Et quondam ante tempora

a sene prophetatum

Dignare, clementissima,

acceptare gratum

Meque tecum iugiter

fac vere beatum.