48. De Compassione BMV.
Ad Matutinum.

1. O beata, perturbata,
Pia mater Domini,
De amara et avara
Morte tui filii.

2. Quot tormenta, quot lamenta,
Quanti tui gemitus,
Cum rex caeli tam crudeli
Morte fuit traditus !

3. Corde tristi pertulisti
Passionis gladium,
Dum rex fortis dirae mortis
Patitur supplicium.

4. Nam rex magnus velut agnus
Immolari voluit
Et per crucem nobis lucem
Salutis restituit.

5. Duris Iesus plagis caesus
Et corona spinea
Coronatus et per latus
Est transfixus lancea.

6. Post hoc sui nati frui
Caeli in palatio
Vultu digno ac benigno
Matris det compassio.

7. In amore et honore
Matris passo filio
Sit decennis ac perennis
Laus et iubilatio.

Ad Laudes.

1. O Maria, mater Christi,
Dolore plena tu fuisti,
Cum filius in cruce totus
Cruore suo fuit lotus.

2. Acetum sumpsit felle mistum,
Dum gustasset potum istum,
Caput suum inclinavit,
Patri spiritum commendavit.

3. Sic per mortem temporalem
Nostram solvit aeternalem,
Grates tantae caritati
Nunc agamus vulnerati.

4. Imploramus te, piissima,
Pro impetranda venia,
Ut nobis Christi passio
Culparum sit remissio.

5. Hoc praestet tuus filius,
Iesus benignissimus,
Cum patre et paraclito
Qui regnat sine termino.

Ad Primam.

1. Tam lucis perit claritas,
Quae mundi fuit sanctitas
Mortem per turpissimam
Vere et. immanissimam.

2. Lingua nulla exprimit,
Lumen quid idem pertulit
Crucis in patibulo,
Quae nostra sit redemptio.

3. Deo patri cum filio
Et spiritu paraclito
Nunc et semper sit gloria
Per saeculorum saecula.

Ad Tertiam.

1. Nunc, sancte, nobis omnibus
Ignosce delinquentibus,
Christe, redemptor omnium,
Exaudi preces supplicum.

2. Os, lingua, mens te flagitat,
Ut idem nobis tribuat
Tua benigna pietas
Et piae matris bonitas.

3. Tu esto nostrum gaudium,
Qui es futuram praemium,
Sit nostra in te gloria
Per saeculorum saecula.

A d Sextam.

1. Rector potens, tu aspice
Et mala ista comprime,
Quae tuum premunt populum,
Et ei fer auxilium.

2. Exstingue flammas mentium
Miserarum gentium,
Matris per subsidium
Tu culpas dele omnium.

3. Tu esto nostrum gaudium.
Ad Nonam.

1. Rerum Deus piissime,
Matris planctum respice,
Quem sub cruce pertulit,
Dum cor eius ensis laedit.

2. Largire cunctis servulis,
Quos mundat unda sanguinis,
Nescire lapsus criminum
Nec mortis ferre reditum.

3. Tu esto nostrum gaudium.
Ad Vesperas.

1. O Maria, stella maris,
Ecce, tuus salutaris
Pro salute hominum
Crucis subiit supplicium.

2. Haec palma victoriae,
Portus et porta gloriae,
In qua, mater, tuus natus
Totus pendet vulneratus.

3. Haec salutaris passio
Et sanguinis effusio
Mundum purget a peccatis
Opus complens pietatis.

4. Tui virtute sanguinis,
Obtentu matris virginis
Da nobis mundum vincere
Et tecum semper vivere.

5. Haec castae matris dignitas,
Sacra praestet trinitas,
Pater atque filius
Sanctus quoque spiritus.

Ad Completorium.

1. Fit porta nostra hodie
Patens caelestis gloriae
In apertura lateris
Filii Mariae virginis.

2. Genus omne saeculi
Laudes sacrae virgini
Tu cane in perpetuum,
Quae solvit Evae debitum.

3. Honor decet filio,
Suo qui supplicio
Nos duxit ad caelestia
Aeternae pacis gaudia.

4. Laus patri sit et filio
Et spiritui paraclito,
Qui vitam sine termino
Nobis donet in patria.