58. Horae beatae Mariae V.
Ad Matutinum.

1, Gaude, virgo principalis,
Per quam decor virginalis
Accepit exordium,

Per quam amor enituit,

Amor in mundo floruit

Inter spinas lilium.

2. Gaude, virgo, decus morum,
Cuius nomen est flos florum,
Flos amoris, flos gaudii,
Flos aeterni palatii.

3. O flos florem concipiens,
O rosa rosam pariens,
Tuo rore nos irrora,
Tuo flore nos colora,
Per te mens nostra gaudeat
Et in Deo refloreat.

4. Gaude, decus ecclesiae,
Mater misericordiae,
Virgo mitis et benigna,
Sola bona, sola digna
Omni laude et honore
Omni loco et tempore,
Omni maior praeconio
Omnique desiderio.

5. Tuas virtutes canere
Laudes auditas facere
Nec ipsa vox angelica
Nec tota posset musica;
Te amare, te laudare,
Te post Christum suspirare
Sit nostra sapientia,
Sit nobis super omnia.

6. Gaude, gemma puellarum
Et Maria Mariarum,
Hoc nomen praestat ceteris
Quinque formatum literis:
Te magnam prima litera,
Almam designat altera,
Et tertia te regnantem,
Quarta vero imperantem,
Quinta te agnam nuntiat,
Agnam, quae labe careat.

7. O virgo mater Domini,
Tuo beato nomini
Nostra subscribe nomina
In libri vitae pagina.

8. Gaude, regina nobilis,
Virgo incomparabilis,
Cuius est corpus puritas
Et novitatum novitas,
Cuius mens desiderium
Et gaudiorum gaudium.

9. Gaude, virgo dulcissima,
Cuius corpus et anima
Singulare miraculum,
Miraculorum speculum.

10. Gaude, cuius eloquia
Sunt sicut mala aurea,
Et cuius motus animi
Vincunt odorem balsami.

11. Gaude, cuius operibus
Tamquam stolis regalibus
Nitet corpus ecclesiae,
Vestitur rex iustitiae.

12. Gaude, virgo amabilis,
Tota desiderabilis,
Rosa rosarum omnium
Et liliorum Ulium,
Da nobis desiderium
Videndi te et filium,
Ut vestro desiderio
Vestra accedat visio.

13. O laudanda fecunditas,
Quam sic amat virginitas.
Ut osculo perpetuo
Se osculentur mutuo.
Tam pia foederatio,
Quae in te floret unica,
Nos per te iungat filio,
Mater tota deifica.

14. O filii tu filia,

Tu amori semper vaca
Et dilectum nobis placa
Orandi instantia.

15. Nunc abundat iniquitas,
Et refrigescit caritas

In multorum cordibus,
Unde magis est gemendum,
Humilibus innitendum
Tuis almis precibus.

16. Tuus amor afficiat,

Ad te cor nostrum rapiat

Totum, non dimidium,
Ut cantemus prae amore
Laudes tuas cum honore

In terra viventium;

Ut nostra contemplatio
Tibi et tuo filio

Vacet cum laetitia,
Vos laudando cotemplari,
Contemplando admirari

Est suprema gloria.

17. Gaude, nostra sollemnitas,
Gaude, nova iucunditas,
Gaude, gaude, ros gratiae,
Gaude, gaude, flos gloriae,
Gaude, quae veste candida
Omniformi et fulgida
Sola fulgens in solio
Sedes imperatorio.

18. Gaude, quam sapientia
Zona praecinxit aurea,
Zona non ab hominibus,
Sed Dei facta manibus ;
Gaude, quam Deus annulis
Ornavit et muraenulis,
Armilla, dextrochirio,
Torque, monili regio.

19. Gaude, virgo pulchra tota,
In amoris fonte lota
Manu innocentiae,
Per quam amor mundum lavit
Et lavando dealbavit
Candore iustitiae.

20. O mater desiderii,
O civitas refugii,

O gemma iustitiae,
Tibi soli sit sanctitas,
Sit primatus, sit dignitas
Honorificentiae.

21. Da gaudium auditui,
Da et nostro spiritui,

Non superbe sapere,
Sed ex affectu intimo
Deo, tibi et proximo

Totam mentem subdere.

22. Fac nos per tuum meritum
Unum cum Deo spiritum
Caritate gemina,

Ut cursu semper prospero
De nostro fluant utero
Aquae vivae flumina.

23. Gaude, quae turtur turturum,
Columba es columbarum,
Cuius nidus simplicitas,
Et volatus est castitas.

24. Gaude, cuius castitati,
Cuius summae maiestati
Caeli caelorum rutilant,
Caeli caelorum iubilant.

25. Gaude, per quam caelestia
Amplexantur terrestria,
Per quam suscepit saeculum
Cum Deo pacis osculum.

26. Gaude, mater orphanorum,
Vera nutrix parvulorum,
Quos lacte nutris gratiae,
Sinu fovens clementiae.

27. Gaude, nostra felicitas,
Dulcedo, spes, victoria,
Vita, salus, sublimitas,
Virtus, misericordia.
Da nobis inter ubera
Dulcem murrae fasciculum,
Cuius vis salutifera
Cordis conservet loculum.

28. O sublimis puerpera,

Complectens omni tempore
Dilecti tui vulnera
In sacrosancto pectore,
Fac ad nostrum solacium
Dilectum tui uteri
Nostrorum semper cordium
Totis medullis inseri.

29. Tu balsamus pretiosa
Dans balsamum salutare,
Tu vitis es generosa,
Vivo fecunda nectare ;
Huius nos vino nectaris
Vivo potu vivifica
Et balsami salutaris
Unctione salvifica.

Ad Laudes.

1. Gaude, virgo egregia,
Mater solis et filia,
Per quam nox finem habuit.
Sol de sole resplenduit.

2. Gaude felici gaudio,
Eodem gaudens filio,
Quem Deus, auctor omnium.
Gaudet habere filium.

3. Gaude tanto consortio,
Condigna Deo socio,
Et da, ut in hoc foedere
Sit nobis nasci, vivere,
Sit mors, sit resurrectio,
Sit nostra consummatio.

4. Gaude, nostrae lux fidei,
Praedux stella sanctae spei,
Dux ad montem aromatum,
Ex sabbato ad sabbatum,
Dux a fide ad speciem,
Ad iubilaei requiem.

5. Gaude, serena domina,
Splendor verus, lux divina,
Caelum, caeli serenitas,
Stella, stellarum claritas,
Nobis intus irradia
Tui splendoris gloria,
Ut cordis nostri mansio
Vero splendescat radio.

6. Tu virtutum harmonia,
Luna defectus nescia,
Tota melos et iubilus,
Tota lumen et oculus ;
Tuum melos nos mulceat,
Tuum lumen nos induat,
Sit nobis tua facies
In noctibus meridies.

7. Gaude, sponsa, quae amorem
Pium habes dilectorem,
Dilecta prae omnibus,
Tu amorem grata vice
Amantem amas unice
Totis ex visceribus.

8. O sponsa, quae plus amasti,
Plus amando suspirasti

Sponsi tui speciem,
Te iustum est plus gaudere,
Te dignum est plus videre

Eius sacram faciem.

9. Ergo gaude plus quam multum
Et dilecti vide vultum

Singulari gratia,
Amplexantem amplexare,
Osculantem osculare

Perenni concordia.
10. Cui cum patre ingenito
Et spiritu paraclito
Humilitatis hostiam
Offerimus et gloriam.

Ad Primam.

1. Gaude, aurora saeculi,
Domus novi diluculi,
De qua lux lucis prodiit
Et in mundo apparuit.

2. Gaude, mater, salvo flore
Ortus surgentis aurorae,
Quae diei primordia
Dedisti in ecclesia.

3. Gaude, mater luciferi,
De cuius sacri uteri
Benedicto sacrario
Refulsit benedictio.

4. Gaude, mater principii,
Gaude, flos desiderii,
Quae edidisti omnibus
Desideratum gentibus.

5. Gaude, Sion ecclesiae,
Per quam apparente die
Umbra noctis evanuit
Et laetum mane claruit.
Esto lux nobis praevia
Et oriens ad gaudia,
Ut solis veri specie,
Vero fruamur hodie.

6. Imperatrix palliata
Novo sole, coronata
Duodecim sideribus,
Lunam habens sub pedibus.
Verum nobis luciferum,
Sidus ostende siderum,
Ut cernamus sine fine
Lumen in eius lumine.

7. Gaude, quae es forma Dei,
Diadema speciei,
Gaude,per quam mundus ridet,
Quia veram lucem videt.

8. Gaude, tota munditia,
Tota dies et gloria,
Per te ex alto veniens
Illuminet non oriens,
In quo cor meum rideat
Risu, qui fine careat.

9. Gaude, prima laetautium,
Primitiae gaudentium,
Da maue sine vespera,
Da corda nobis libera.
Da primae pacis prospera,
Da unitatis foedera,
Da sanctitatis munera
Da honestatis opera.

10. Da fidei constantiam,
Da veram sapientiam,
Da laetam patientiam,
Da gratam verecundiam,

Da spiritus modestiam,
Da puram conscientiam.
11. Gaude, lampas caritatis
Et lucifer humilium,
Sol septuplae claritatis,
Dies dierum omnium;
Iube, ut nos humilitas,
Virtus virtutum, impleat,
Per quam in nobis caritas
Ardens et lucens fulgeat.

12. O orientis oriens,
Aurora solis nuntia,
O sol solem parturiens,
Dies diei praevia;
Da tam praesuavi sibilo
Mentis adflari intima,
Per quem amoris iubilo
Nostra exsultet anima.

13. O ver, veris temperies,
Quo reviviscunt omnia,
Aestas, aestatis species,
Quo innovantur gaudia,
Fac nos intus innovari
Virore, qui non deficit,
Et in Deo iucundari,
Qui solus vere sufficit.

14. Deus, aeterna puritas,
Una et trina suavitas,
Sit tibi iubilatio
Purae mentis affectio.

Ad Tertiam.

1. Gaude, nostra Hierusalem,
Per quam pacem principalem
In aeternum habebimus,
Quando Christum videbimus,
Quem amare est pietas,
Quem videre satietas.

2. Gaude, porta iustitiae,
Via supernae patriae,
Cuius sequi vestigia
Est veritas et gloria.

3. Gaude, quae dilecto tuo
Amore individuo
Coniuncta aeternaliter
Gaudes ineffabiliter.

4. Gaude, ficus suavifera,
Dei plantata dextera,
Finis amaritudinis,
Principium dulcedinis.

5. Gaude, virgo de Nazareth,
In te vere nihil aret,
Tu tota innocentia,
Flos et magnificentia,
Libertas, incoriuptio,
Ubertas et electio,
Honestas, elegantia,
Potestas, excellentia,
Maiestas, dominatio,
Venustas, admiratio;

Da, ut mente Nazareni,
A vitiis alieni,
Proferamus sine spina
Multa virtutum germina.
6. Gaude, caelestis viola,
Flos dignus Deo incola,
In qua Deus et amore
Totus mansit et corpore;
Beata tua viscera,
Venter, dorsum et latera,
Pectus, guttur, lac, ubera,
Os, oculi et labia,
Caput, collum, frons et aures,
Lingua, dentes, genae, nares,
Lacerti, manus, humeri,
Crura, pedes et digiti,
Quinque sensus corporei,
Crines, vestes et calcei,
Cogitatus et opera
Et tua verba omnia.

7. O lux mundi, lucis mater,
Te signavit Deus pater,
Qui nasci de te voluit
Deum, quem de se genuit;
Tam praeclara nativitas
Sit nostrae mentis claritas,
Et nos per te simus dii,
Dei et tui filii.

8. O virgo, flos imperii,
O pulchrituto gaudii,
Gaude, maior imperio,

Et singulari gaudio.
Gaude, origo gaudii,
Mater aeterni lilii,
Per quam Christus, flos mon-
tium,
Flos factus est convallium.

9. O dilecta cum dilecto,
O electa cum electo

O rosa cum lilio,
Tibi candor cum rubore,
Tibi decus cum decore,

Tibi laus cum gaudio.

10. In te sibi complacuit,
In te amor constituit
Locum suae gloriae,
Te elegit, te amavit,
Te prae cunctis consecravit
Oleo laetitiae.

11. Da, ut nos amor vulneret
Et vulnerando superet

Felici victoria,
Amor, qui supereminet,
Sperat, suffert et sustinet,
Credit et vincit omnia.

12. Dulcis vocum symphonia
Cum iubilo mentis piae
Det hymnum et gloriam
Invicto regi gloriae.

Ad Sextam.

1. Gaude, plena veritatis,
Plenitudo bonitatis,
De cuius abundantia
Bonis abundant omnia.

2. Gaude, reorum venia,
Gaude iustorum copia,
Gaude, mater glorifica,
Spiritu balsamitica,
Carne autem cum ossibus
Murra cum aromatibus.

3. Gaude, cuius cor humile
Vulnus amoris nobile
Pertransivit medullitus
Et fecundavit caelitus,
Cuius opus clementia
Et voluntas potentia,
Cuius odor est vitalis
Medicina immortalis,
Da nobis spei gaudia,
Da amoris suspiria.

4. Gaude, virgo, quae oleum
Per uterum eburneum,
Austro perflata dulciter,
Nobis fudisti largiter.
Unge cor nostrum oleo,
Quod per te partu aureo
Sua se nobis gratia
Plena effudit copia.

5. Paradisus voluptatis,

Aquis vivis irriguus,
Fons totius pietatis,

Lacte et melle profluus,
Puro lacte, pio melle

Nostra infundens vascula,
Fac nos pios sine felle,

Puros sine macula.

6. Gaude, manna virginale,
Manna novum et regale,
Quod nulli sapit hominum,
Nisi palato virginum.

7. Gaude, felix, et iubila,
Cum melle fruens simila,
Cum lacte bibens balsamum
Intra amoris thalamum;
Quae tua pascis specie
Dilectum in meridie,
De cuius mensa regia
Vivit omnis ecclesia,
Da nobis Deum sapere,
Eius amore vivere.

8. Gaude, per quem panis caeli
Novo datur Israeli,
Quem nulli licet edere,
Qui necdum scit diligere;
Tu vallis et frumentalis,
Quae frumenti aeternalis

Protulisti nobis granum,
Cuius esu cor fit sanum,
Fit pinguior, fit fortior
Noster homo interior.

9. Talis frumenti adipe
Nos saginari praecipe,
Ne cor nostrum arefiat
Et in via deficiat,
Da veritatis epulum,
Sinceritatis poculum,
Ut cum sinceris animis
Epulemur in azimis.

10. O insignis sponsa Dei,
Alma mater almae spei,
Lignum vitae almifluum,
Fructum ferens praecipuum,
Ostende nobis sobrias
Sponsi sponsaeque nuptias,
In illa dulci patria
Fructu vitae nos satia.

11. Gaude, virgo aetherea,
Vivam nucem parturiens,
Urna decens et aurea,
Verum manna suscipiens;
Huius panis angelici
Nos repleas pinguedine,
Ut tam pii viatici
Oblectemur dulcedine.

12. In te dulce convivium,
In te omnes deliciae,
In te electuarium
Et sapor omnis gratiae.

13. Deus pater, Deus fili,
Deus amborum caritas,
Tibi soli laudabili
Sit laus, honor et claritas.

Ad Nonam.

1. Gaude, columna gemmea,
Cuius basis est aurea,
Columna mundum sustinens
Et super caelos eminens.

2. Gaude, nardus humillima,
Humilitate maxima,
Tota virgo humilitas
Et humilis virginitas.

3. Gaude, pascha fidelium,
Laudatio laudantium,
Per quam nobis ad gaudia
Fit transitus paschalia,
Ubi semper gaudebimus,
Christum et te videbimus.

4. Gaude, cedrus exaltata,
In amore radicata,
Gaude, oliva viridis,
Ramis iucunda floridis;
Hortus clausus et amoenus,
Omni flore semper plenus,
Quem totum singulariter
Auster perflavit dulciter.

5. Gaude, quae septem sidera
In tua habes dextera,
Maria re et nomine,
Quae omni luces lumine.

6. Beati, qui te diligunt,
Qui te amore eligunt

Affectu plenario,
Te diligentes dilige,
Te eligentes elige
In caeli palatio.

7. Gaude, cuius nativitas
Vernalis est amoenitas,
Per quam hiems pertransiit,
Aestivum tempus rediit,
Cuius natura bonitas,
Cuius statura sanctitas,
Cuius forma dilectio,
Excisa Dei digito,
Nostrae decenter animae
Formam amoris imprime.

8. Gaude, templum marmoreum
Et civitas solstitii,
Castellum solis vitreum,
Solis occasus nescii;
Fac nos templum castitatis.
In quo sit Dei solium,
Fac castellum puritatis,
In quo fiat solstitium.

9. Gaude, mundi reparatrix,
Creaturas recreatrix,
Quod sine te fecit Deus,
Tecum refecit dignius,

Et quod per se disposuit,
Per te complere voluit,
Ut merito quodam iure
Nomineris creaturae
Finis atque initium
Cum filio per filium.
Ope tui et favore
Sit in nobis iugi more
Humilitas plenaria,
Quae omnis est iustitia.

10. Gaude, cuius melodia
Laus nimis amatoria,
Vox est arcani moduli,
Vox osculorum osculi,
Dat auri lene sibilum,
Dat iubilorum iubilum.
Qui habet aures audiat,
Aure amoris capiat,
Qui enim non amaverit,
Nunquam audire poterit.

11. O dilectrix dilectoris,
O genitrix genitoris,
Da nobis pura labia,
Cor mundum, recta studia,
Ut tuam tuo munere
Laudem possimus canere.

12. Gaude, mater cuius vita
Liber vitae, lex ignita,
In qua nihil superfluum,
Nihil amore vacuum,
In corde nostro domina,
Legem amoris ordina.

13. O speculum munditiae,
Mundis infulgens cordibus,
Vas summae excellentiae,
Gemmis ornatum omnibus,
Vivo imbre vivae nivis
Serena nobis oculum,
Ut mundati aquis vivis
Sponsi sumamus poculum.

14. Deo soli iustitiae
Sit iucunda laudatio,
Sit canticum laetitiae,
Sit gratiarum actio.

Ad Vesperas.

1. Gaude, matrona caelica,
Exsultando magnifica
Deum tuum salutarem,
Qui te fecit singularem.
Tu ancillam Iesu Christi
Te vocare voluisti,
Sed, ut docet lex divina.
Ipsius tu es domina,
Nam ius habet et ratio,
Matrem praeesse filio.
Ergo ora suppliciter
Et praecipe sublimiter,
Ut nos in mundi vespera
Ducat ad regna supera.

2. Gaude, quae Dei filium
Tuum per carnem proprium
Ventris portasti thalamo.
Lactis potasti balsamo.

3. Gaude, quae verum amicum,
Fontem amoris unicum,
Frequentasti amplexibus
Amorem redolentibus.

4. Gaude, quae pio filio
In virginali gremio
Dulcem infigens oculum
Suave dedisti osculum.

5. Gaude, quae mundis manibus,
Plenis rosarum floribus,
Sceptro et pomo aureo
Parvo lusisti filio.

6. Gaude, quae voce praeclara
Tamquam caelesti cithara
Novo epithalamio
Praecinuisti filio.

7. Gaude, quae sponsa concinis
Cantum, cuius non est finis,
Tuum epithalamium
Tibi soli sit proprium.

8. Sacram vocem tuae laudis
Sola promis, sola audis,
Et dilectus tuus tecum,
Qui te gaudet esse secum
Amoris privilegio
Sicut matrem cum filio.

9. Bona mater, bone fili,
Vestrae laudi amabili
Totus mundus oboediat
Et cum amore serviat.

10. Gaude, quae sola libere
Debes et potes dicere:
Ego, ego sum regina,
Praeter me non est domina.
Ego dilecto proprio,
Cuius ad me conversio ;
Ego illi, mihi ille,
Unus uni inter mille,
Beatis sum beatior,
Nobilibus nobilior.
Tuae beatitudinis.
Mater Dei et hominis,
Tuo nobis auxilio
Vel parva detur portio.

11. Gaude, quae in hymno tuo
Plus quam satis mellifluo
Laudans in te mente pia
Magna Dei magnalia
In Domino te laudasti,
Te laudandam prophetasti,
Dum beatam ab omnibus
Te dicendam fidelibus
Veraciter praevidisti,
Humiliter praedixisti.

12. Ergo iuxta verbum tuum
Beatam in perpetuum
Te omnis generatio
Dicat cum desiderio:

Ad Magnificat.

1. Gaude, precor, gaude, quia non est par tibi laude
Solaque post Christum miseris semper misereris.

2. Gaude, dilecta, [Deum] quae dilectum genuisti.
Caelitus adflata caeleste melos cecinisti.

3. Laus tua Magnificat humili praecellit amore,
Nullus eam dicat, qui non sit purus in ore.

4. Laus decantanda mentis iubilante medulla,
Semper laudanda, cui laus non sufficit ulla.

5. Lingua novi cordis, nullius conscia sordis,
Debet eam canere, pro voto semper habere.

6. Qui cor habet sursum nec quavis parte deorsum,
Scit decantare, quia scit speculando vacare.

7. Huic soli posse datur hanc laudem modulari,
Cui datur et nosse, quam dulce sit speculari.

8. Qui te diligere, tibi vult ex corde placere,
Magnificat memoret, amet, admiretur, honoret.

9. O virgo celebris, mater clarissima Christi,
Quae mundi tenebris lucem de luce dedisti,

10. Vive, decorare, flore, fulge, vale, cane, plaude,
Vince, coronare, regna, rege, praecipe, gaude.

11. Ride, laetare, praecelle, vale, dominare,
Sit tibi reginae caeli sedes sine fine.

12. Lux maiestatis, totius honor bonitatis,

Summae potestatis, flos summae nobilitatis,

13. Nunc mihi forma tui splendorque tuae speciei
Sit prius esuries, postea sit saties.

14. Speque supernorum homo sim desideriorum,
Ut, quod amo, videam, perpetuo teneam.

Ad Completorium.

1. Gaude, virgo perpetua,
Nostrae quietis ianua,
Te angeli glorificent
Et omnes sancti praedicent.

2. Te humiles, te virgines,
Te laudent omnes homines,
Te benedicant aethera,
Te sol, luna et sidera.

3. Te aer, tellus, maria,
Fontes, nix, ros et pluvia,
Te piscis, aves, pecora,
Te dies, aetas, tempora,
Te herbae, rosae, lilia,
Te omnis flos et germina.

4. Gaude, sponsa, quae floribus
Digne fulciris omnibus,

Per quam florent omnia,
Quae innixa sponso Deo
Cantas: amore langueo;

Una super milia,
Fulci cor nostrum floribus
Suavitatem spirantibus,
Ut dilecto redolant
Et ad quietem placeant.

5. O Salomonis ferculum,
Amor, amplexus, osculum,
Lectus vallatus liliis
Lampadibusque aureis,

Da nobis lectum nobilem,
Id est amorem humilem,
In quo dilecti suavibus
Astringamur amplexibus.

6. Pax nostra indeficiens

Et custos nunquam dormiens,
Quae habes septem oculos,
Quibus custodis parvulos,
Nos in virtute modica
Custodi et pacifica,
Quae nos Deo humiliet,
Humiliando societ.

7. Gaude, virtutum omnium
Suave reclinatorium,
Gaude, quae dulci sopore
Requiescis in amore.

8. Gaude quae, supercilia
Habes semper stillantia,
Cuius resplendent palpcbrae,
Quas nullae claudunt tenebrae;
Fac nos in hoc exsilio
In castitatis gremio
Humiliter quiescere,
Somnum amoris capere.

9. Gaude, puella regia,
Pudoris primiceria,
Tu in die vigilasti,
Quia noctem ignorasti.

10. Tu in prima vigilia,
Id est tua infantia,
Vigilare didicisti,
Ut discamus vigilare,
Christum et te exspectare,
Vigilando docuisti.

11. O beata virgo, veni,
Vigilantes nos inveni,
Vel secunda vel tertia
Saltem noctis vigilia.

12. Gaude, quae nocti hominum
Lumen dedisti luminum,
Fac nos novo sidere
In hac nocte diescere;
Sit thorus noster castitas,
Sit requies humilitas,
Ut tua sub custodia
Dormiamus in gratia.

13. Mentem da paci habilem,
Da somnum Deo vigilem,
Sit nobis dulce somnium
Memoria caelestium,
Ut sponsum puro oculo
Videamus in speculo.

Conclusio.

1. O caeli viola, solio dignissima sola,

Te decet imperium, sola, tenere solum.
2. O laus iustorum, maiestas summa polorum,

Sit tibi laus soli, palma, corona poli.
3. O pater, o Domine, sine principio, sine fine,
Tu es rex regum, qui das moderamina legum

Iure tuae legis cuncta creata regis.
4. Sola tui socia sit honoris virgo Maria,

Et tecum sedeat, iudicet et iubeat.
5. Si non formavit, tamen omne, quod est, reparavit,

Et sic cuncta suo subdidit imperio.
6. Ergo, sancte pater, sit semper regia mater

Tecum regina, cum Domino domina.

AdminBookmark

Flos amoris, flos honoris,
Flos superni gaudii,
Flos aeterni palatii.

AdminBookmark

Gaude, mater misericordiae,
Gaude, solamen nostrae miseriae.

AdminBookmark

Tibi soli sit sanctitas,
Primatus caeli curiae,

Tibi soli sit dignitas,
Laus honorificentiae.

AdminBookmark

Quae luces super omnia
Ut stella matutina.

AdminBookmark

Gaude, sponsa, quae amoris
Nexu tui conditoris
Diligeris prae omnibus.

AdminBookmark

Laetifica nos, gaudii
Mater, in gaudio

Et fac filios gaudii
In tuo filio.

AdminBookmark

AdminBookmark

Tu robur firmamenti,

Tu vallis es frumenti,

In qua crevit nobis granum.

AdminBookmark

Quem amare est pietas,
Quem videre satietas.

AdminBookmark

Quae meis in pectoribus
Sit omnibus temporibus.

AdminBookmark

Opus magnae clementiae,
Adesto nobis comminus.

AdminBookmark

Gaude, quae cum sponso vivis,
Uti sola Phoenix avis,
Sponso carmen concinis
Novum, cuius non est finis.

AdminBookmark

Pulchrum epithalamium,
Tibi soli proprium.

AdminBookmark

voces invocantium,
Te digne laudantium.

AdminBookmark

Virgo, flos florum, duc nos ad regna polorum,
Ut, quam diligimus, te perpetuo videamus.

AdminBookmark

Ut ducas nos ad patriam
Per humilitatis viam.

AdminBookmark

Exaudi nos, piarum piisima,
Spes peccatorum, virgo Maria.

AdminBookmark

Nosque post (huius) vitae terminum
Ad verum trahat gaudium.

AdminBookmark