68. De s. Iohanne Evangelista.
Ad Matutinum.

1. Inter flores paradisi

Floret candens Ulium,
In dulcore Dei visi
Vernans ut convallium.
2. De radice geminatur
Regia pontificum,
Qua felice stirpe datur
lesus, manna caelicum.
3. Hic est gratus nepos Christi,
Plus dilectus ceteris,
Non gravatus morte tristi
Qui conregnat superis.

4. Ut saphirus beatorum
Inter gemmas emicat,
Fugans virus vitiorum
Cor mundum laetificat.

5. O caelestis flos odoris,
Nitens gemma gloriae,
Intus maestis, laesis foris
Medicina gratiae.
6. Sanctitatis medicamen
Tuis da supplicibus,
Cum beatis consolamen
Praebens in caelestibus.

Ad Laudes.

1. Dum solaris eclipsatur
Vera lux iustitiae,
Stellae maris sociatur
Lucifer munditiae,

2. Quia crucis in duello
Iohannes cum virgine
Miles ducis ut in bello
Stabat et certamine.

3. Inde solis in eclipsi
Lucifer hic saucius
Loco prolis datur ipsi
Maris stellae filius.

4. Sic iocale pretiosum
Fido datur militi,
Virginale generosum
Castrum Dei geniti.

5. Et condigno commendatur
Virgo mater virgini,
Dum in ligno morti datur,
Vitam praebet homini.

6. Ergo tecum matre iuncta
Ora, nepos, filium,
Ut det secum sine cuncta
Vitae nobis praemium.

A d Primam.

1. Iam placenti cunctae genti
Lucis orto sidere
Pro salutis et virtutis
Deprecemur munere.

2. In hac die, Christe pie,
Nos ad bonum suscita
Virginalis et regalis
Iohannis per merita.

3. Illibatae, tibi gratae
Carnis da munditiam,
Nostri cordis labes sordis
Pellens dona gratiam.
4. Haec dignare nobis dare
Tota simul trinitas,
Tribus bonis in personis
Unaque divinitas.

Ad Tertiam.

1. Nunc infunde te iucunde
Nobis, sancte spiritus,
Et afflictis pro delictis
Clemens sis paraclitus.

2. Intus pure nos adure,
Tu flamma caelestium,
Plenioris ob amoris
Iohannis incendium.

3. Esto ductor et instructor
In hoc mundi devio,
Ut per piam vitae viam
Pergamus cum gaudio.

4. Haec dignare nobis dare,
Tota simul trinitas,
Tribus bonis in personis
Unaque divinitas.

Ad Sextam.

1. Potens rector et protector,
Qui benigne temperas
Vices rerum, solus verum
Sceptrum tenens imperas.

2. Plaga mentis, non tormentis
Martyris discipuli
Prece pura de pressura
Libera nos saeculi.

3. Arma lucis hic caducis
Tuis da supplicibus,
Ut vivamus et reddamus
Mala cum virtutibus.

4. Haec dignare nobis dare,
Tota simul trinitas,
Tribus bonis in personis
Unaque divinitas.

Ad Nonam.

1. Rerum Deus, factor meus,
In te motum nesciens,
Motum tamen et spiramen
Vitae cunctis largiens.
2. Vita functi nec defuncti
Necis cum supplicio,
Cunctis annis nos Iohannis
Salves patricinio.

3. Mortis gravis et ignavis
Morsum pelle criminis,
Post praesentem da manentem
Vitam sine terminis.
4. Haec dignare nobis dare,
Tota simul trinitas,
Tribus bonis in personis
Unaque divinitas.

Ad Vesperas.

1. Ave, maris stellae custos,
Digne summis laudibus,
Qui praeclaris inter iustos
Emicas virtutibus.
2. Summi regis ut amicus
Agnoscis mysteria,
Scriptor legis et pudicus
Virgo florens gratia.
3. In doctrina veritatis
Tu magister sapiens,
Unum trina, trinitatis
Unum neuma sentiens.

4. Nidum ponis in sublimi,
Alte volans aquila,
Dum exponis nati primi
Ortum ante saecula.
5. Visu mundo solis lumen
Recto cernis radio,
Fulgens mundo verbi numen,
Christi cubans gremio.
6. Cuius prece, Deus unus,
Pater, verbum, spiritus,
Victa nece vitae munus
Nobis dona caelitus.

Ad Completorium.

1. Te benignum, laude dignum,
Iesum Christum Dominum
Invocamus et laudamus
Lucis ante terminum.

2. Ultimata cena data
Tuo fulti pectore
Prece dulci tu nos falci
Noctis omni tempore.

3. Inimicus ut antiquus

Non illudat mentibus,
Carnis more prae sopore
Quietem petentibus.

4. Haec dignare nobis dare,
Tota simul trinitas,
Tribus bonis in personis
Unaque divinitas.