72. De sancta Katharina.

Ad Matutinum.

1. Ave, felix Katherina,

Euge, virgo columbina,

Vale, martyr et regina,

Salve, stella matutina.

2. Ave, dulcis et benigna,

Iugi semper laude digna,

Nulli dura vel maligna,

Deo, quaeso, me consigna.

3. Ave, prudens et perita,

Multis bonis insignita,

Per te, precor, sint contrita

Tela daemonis ignita.

4. Ave, pulchra Sion nata,

Agni vellere ornata

Et honore coronata,

Nobis assis exorata.

5. Ave, domina decora,

Assis mihi mortis hora,

Ne me ad exteriora

Daemon trahat, elabora.

Ad Primam.

1. Ave, virgo Katherina,

Ex qua flagrat lux divina,

Prece quaeso te supina,

Mitem mihi te inclina.

2. Ave, pulchrior aurora,

Te laudantem non ignora,

Pro me Christum tu exora,

Ut me regat omni hora.

3. Ave, virgo fide plena,

Sponsa Christi, spes serena,

Frange nunc peccati frena,

Ne me vexet ultrix poena.

4. Ave, virgo verecunda,

Placans Deum mente munda,

Ut me solvat a profunda

Procellosi maris unda.

5. Ave, lumen et lucerna,

Praebens iter ad superna,

Meam vitam sic guberna,

Ne descendam ad inferna.

Ad Tertiam.

1. Ave, clemens Katherina,

Rosa rubens sine spina,

Sis tatanien a ruina

In voragine marina.

2. Ave, virgo sancta Dei,

Miserere, precor, mei,

Ancora sis meae spei

Et solamen cordis mei.

3. Ave, quies cordis maesti,

Salve, virgo, quae caelesti

Christo regi adhaesisti,

Dum terrena contempsisti.

4. Ave, decus firmamenti,

Praebe piam te poscenti

Et medere meae menti

In peccatis dormienti.

5. Ave, fortis agonista,

Tua prece Deo insta,

Ut transacta vita ista

Me non locet in sinistra.

Ad Sextam.

1. Ave, martyr Katherina,

Aegrae mentis medicina,

De peccati me sentina

Et de mortis duc ruina.

2. Ave, nobilis puella,

Pro me Christum interpella,

Contra me seda flagella

Et compesce mortis bella.

3. Ave, virgo pulchra tota,

Expers fraudis, bonis nota,

Sume prece cum devota

Famulantum tibi vota.

4. Ave, regalis filia,

Quae fulges inter lilia,

Nos vitae post exsilia

Ad caeli duc sedilia.

5. Ave, dulcis nostra mater,

Sancta ter felixque quater,

Cuius sponsus Deus pater,

Da, ne hostis vincat ater.

Ad Nonam.

1. Ave, sancta Katherina,

Flos illaesus a pruina,

Ad iuvandum me festina

Nunc a fraude serpentina.

2. Ave, sponsa Sunamitis,

Palmes virens verae vitis,

Per te datur pax contritis,

Suffocetur flamma litis.

3. Ave, decora specie,

Plena misericordiae,

Da mihi, mater gratiae,

Virtutem patientiae.

4. Ave, flos pudicitiae,

Lata domus clementiae,

Pro tua pulchra facie

Fer donum paenitentiae.

5. Ave, decus puellare,

Praesens hoc compesce mare,

Quo me cernis fluctuare,

Fac ad portum remigare.

Ad Vesperas.

1. Ave, constans Katherina,

Me informa disciplina,

Bonitate et doctrina

In hac vita peregrina.

2. Ave, Christi vas electum,

Ebur candens bene sectum,

Iter me informa rectum,

Ut incedam per directum.

3. Ave, quae es sublevatrix

Et lapsorum sustentatrix,

Egenorum consolatrix,

Pia semper miseratrix.

4. Ave, salus adflictorum,

Medicamen contritorum,

Mei memor et meorum

Sis vivorum amicorum.

5. Ave, firma spes lapsorum,

Solve nexus dilectorum

Et largire tu bonorum

Nobis copiam cunctorum.

Ad Completorium.

1. Ave, pia Katherina,

Mala pellens vespertina

Me conserva, ne rapina

Fiam hostis repentina.

2. Ave, propago nobilis,

Martyr insuperabilis,

Fac, hostis ut terribilis

Adversum me sit labilis.

3. Ave, virgo famae bonae,

Ab antiquo me praedone

Et a luctus regione

Salva mortis in agone.

4. Ave, speculum virtutum,

In procinctu constitutum

Me indemnem fac et tutum,

Hostem reprime versutum.

5. Ave, Costi stirps herilis,

Precor, licet laus exilis,

Quam nunc offert mens servilis,

Tibi non exsistat vilis.

6. Ave, dulce consolamen,

Posce natum, patrem, flamen,

Ut futurum post examen

Nos cum iustis locet. Amen.