78. De sancto Quirino.

Ad Matutinum.

1. O praeclare pater care,
Fac ad portum remigare
Hos, qui noctis tempestate
Ad te clamant egestate.

Ad Primam.

2. O Quirine, hora prima
Aurem nobis hic inclina,
Ut te promptum in orando
Sentiamus te laudando.

Ad Tertiam.

3. Te rogantes tertiarum
Hora, dolor animaram
Hinc recedat et expurget,
Quos nunc mortis metus urget.

Ad Sextam.

4. Veni, pater, hora sexta
Plena bonis fiant exta
Horum simul et in mundo
Vivant pie corde mundo.

Ad Nonam.

5. Nos educ e malis nona,
Confer nobis vitae dona,
Ut in hora nostrae mortis
Sociemur caeli portis.

Ad Vesperas.

6. Vespertina qui te colunt
Hora, pater, prout volunt,
Illis assis, si in bonis
Eis optent opem donis.

Ad Completorium.

7. Pater, hora iam completa
Veni nobis mente laeta,
Ut peccatis absoluti
Tecum simus semper tuti.

Conclusio.

8. Salutantes te his horis,
Pater, intus atque foris
Tutum tuum adiuvamen
Sentiant lactantes. Amen.