91. Super Ave Maria.

1. Ave fuit salus laeta,
Qua fuisti virgo feta
Verbo patris potentia,
Audi nos. Ave Maria.

2. Maria genetrix Dei,
Per quam salvi fiunt rei,
Depelle cuncta vitia,
Munda nos. Ave Maria.

3. Gratia plena fuisti,

Per quam mundo subvenisti
Lapso, Evae miseria
Leva nos. Ave Maria.

4. Plena donis caelestibus,
Divinis charismatibus
Es in caelesti gloria,
Trahe nos. Ave Maria.

5. Dominus ab initio
Te elegit pro filio

Matrem, cuius es filia,
Iuva nos. Ave Maria.

6. Tecum exstitit in corde,
Praeservans ab omni sorde
Spiritus almi gratia,
Salva nos. Ave Maria.

7. Benedicta parens talis,
Quam culpa originalis
Neque concupiscentia
Foedavit. Ave Maria.

8. Tu, o bona mater Christi,
Subvenisti mundo tristi
Nati tui clementia,
Rege nos. Ave Maria.

9. In sidereis sedibus
Dominaris prae omnibus,
Terram regis et maria,
Deduc nos. Ave Maria.

10. Mulieribus omnibus
Atque cunctis hominibus
Per te praestetur venia,
Concede. Ave Maria.

11. Et angeli restaurantur
Per te atque reparantur
Ac tota caeli curia,
Erige. Ave Maria.

12. Benedictus tuus natus,
Nostros qui tulit reatus,
Nos regat pro te in via,
Ductrix sis. Ave Maria.

13. Fructus est delectabilis
Natis Evae amabilis,
Sanans morbos et vitia,
Largire. Ave Maria.

14. Ventris reclusus in domo
Pro nobis factus est homo
Revocans ad caelestia
Perditos. Ave Maria.

15. Tui filii pretio

Redempti a supplicio
Sumus gratis, mater pia,
Protege. Ave Maria.

16. Iesus, saeculi salvator,
Dei, nostrum mediator,
Sua misericordia
Salvet nos. Ave Maria.

17. Gloria tibi, Domine,

Cum nato, sancto flamine
Ac tibi, genetrix pia,
Suscipe. Ave Maria.