94. Super Ave Maria.

1. Ave, Iesse stirps regalis,
Castitatis lilium,
Maria, pontificalis
Trinitatis solium.

2. Gratia te triumphalis
Decet, plena luminum,
Dominus, ens aeternalis,
Tecum fuit hominum.

3. Benedicta tu, natalis
Solvens nexus criminum,
In mulieribus talis
Nulla, virgo virginum.

4. Et benedictus est talis
Fructus, numen numinum,
Ventris ante virginalis
Et post partus terminum.

5. Tui prece specialis
Det vitae remedium
Iesus nobis, flos vernalis,
Et caelorum gaudium.

6. Amen dicat clericalis
Sicque chorus ordinum,
Atque gens universalis
Benedicat Dominum.