95. Super Ave Maria.

1. Ave, Iesse virgula,

Stella radiosa,
Rosa veris primula,

Tota liliosa,
Agno sine macula

Placens speciosa,
Lactis praebens pocula

Cunctis gratiosa.

2. Maria, spes hominis,

Latrix veri floris,
Virtus tibi numinis

Dat fructum dulcoris,
Claustrum tui virginis,

Zeta creatoris,
Viret vi spiraminis

Sine vae doloris.

3. Gratia gratissima

Mater genitoris,
Virgo praedulcissima,

Thalamus pudoris,
Sponsa venustissima,

Templum redemptoris,
Natum, clementissima,

Placa, stella maris.

4. Plena sancti spiritus,

Gabrielis ore
Concepisti caelitus

Absque carnis more,
Virgo velut primitus

Novo gaudens flore,
Pariens divinitus

Illaeso pudore.

5. Dominus rex nomine,

Eia, res miranda,
Homo fit pro homine,

Res summe laudanda,
Incarnatus flamine

Pro plebe salvanda
Nascitur de virgine

Digne veneranda.

6. Tecum tota trinitas

Fecit mansionem
Et perfecta caritas

Pegit unionem,
Claudis, Sion civitas,

Regem Salomonem,
Et tua virginitas

Vicit Pharaonem.

7. Benedicta filia

Regis angelorum,
Fragrans velut lilia,

Manna parvulorum,
Tua per auxilia

Ad regna polorum
Duc nos post exsilia,

Sola spes lapsorum.

8. Tu in mulieribus,

Virgo singularis,
Infinitis laudibus

Felix honoraris,
Tenebris sedentibus

Flagrans lux solaris,
Opem confer civibus,

Parens expers paris.

9. [Et benedictus] filius

Tuus, rex caelorum,
Frater noster socius,

Pater orphanorum,
Sol eclipsis nescius,

Panis angelorum,
Sit nobis propitius,

Salus perditorum.

10. Fructus delectabilis

Est de te productus,
Per quam Evae flebilis

Terminatur luctus,
Fit Deus placabilis,

Est serpens destructus,
Homo miserabilis

Ad vitam reductus.

11. [Ventris tui] cellulam

Rex sanctificavit,
In qua mansiunculam

Sibi adornavit
Non habentem maculam,

In te se locavit.
Virginalem arculam

Et mundum salvavit.

12. [Amen] canit superis

Chorus angelorum,
Laus humani generis,

Lima confessorum,
Quae sedes a dexteris

Regis saeculorum,
Miserere miseris

Tu nutrix eorum.