97. Super Ave Maria.

1. Ave, lucis speculum,

virgo generosa,
Pudoris signaculum,

Stella luminosa,
Quae salvasti populum,

Mater gloriosa,
Pariendo parvulum,

Qui est legis glosa.

2. Maria, fons gratiae,

Decus castitatis,
Fons misericordiae,

Forma sanctitatis,
Radis innocentiae,

Stella puritatis,
Sedes sapientiae,

Templum deitatis.

3. Gratia multiplici

Iure decoraris
Donoque septemplici

Spiritus ornaris,
Credens verbo simplici

Christum, virgo, paris
Et mereris effici

Parens absque paris.

4. Plena medicamine,

Puteus dulcoris,
Nitens pulchritudine,

Vinculum amoris,
Culpae carens germine,

Salus peccatoris,
Absque viri semine

Mater salvatoris.

5. Dominus, rex omnium,

Deus maiestatis,
Mortis exterminium

Fonsque bonitatis,
Dulce refrigerium,

Auctor pietatis,
Te fecit sacrarium

Sanctae trinitatis.

6. Tecum pura virgine
Verbum incarnavit
Se rorante flamine,
Sicque liberavit
Populum a crimine

Teque consecravit
Et in caeli culmine
Summe sublimavit.

7. Benedicta domina,

Lumen angelorum,
Sursum super agmina

Regnans electorum,
Mundi mundans crimina,

Medela languorum,
Serva nos, ne sarcina

Premat peccatorum.

8. Tu in mulieribus

Iure dominaris,
Cum praecellis omnibus,

Virgo singularis,
Nostris fulge sensibus,

Fulgens stella maris,
Et a cunctis hostibus

Semper tuearis.

9. Et quis potest promere

Laudes matris tantae,
Quae Deum concipere

Spiritu conflante
Meruit et parere,

Virgo post et ante?
Deus pie vivere

Det ipsa rogante.

10. Benedictus genitus

Patri coaequalis,
In secreto conditus

Aulae virginalis,
Descendit divinitus

Fieri mortalis,
Cuius nos interitus

Protegat a malis.

11. Fructus hic mirabilis,

Fructus generosus,
Fructus ineffabalis,

Fructus copiosus,
Fructus venerabilis,

Fructus pretiosus,
Fructus est perutilis

Et deliciosus.

12. Ventris habitaculum

Digne commendatur,
In quo pacis osculum

Mundo reformatur,
Qui non novit masculum,

Venter fecundatur,
De quo vitae pabulum

Cunctis propinatur.

13. Tui ergo famuli

Gratia renati
Supplicamus seduli

Sanctae trinitati,
Ut in fine saeculi

Simus Deo grati
Et regnemus singuli

Caelo collocati.

14. Amen, virgo regia,

Nimis insignita
Praecellenti gratia,

Nobis fiat ita,
Ut mundi miseria

Post mortem finita
Perfruamur gloria

In caelesti vita.

Tu sedes in solio

Digne coronata
Et regnas cum filio

Mater candidata
Ac replens gaudio

In caelis praelata,
Sed in terra miseris

Ades advocata.

In caelo glorificat
Angelorum decus,

Teque beatificat
Latinus et Graecus,

Namque te clarificat
Omne mundi decus,

Luceat haec claritas
Mihi, qui sum caecus.

Mulieribus piis

Tu es sublevatrix,
Ipsis quoque deviis

Tu es gubernatrix,
Omnibus et miseris

Es auxiliatrix,
Tu, virgo tam nobilis,

Sis mihi consolatrix.

Iesus nos eripiat

A coetu malorum,
Iesus nos edoceat

Passus electorum,
Iesus nos custodiat

Fine saeculorum,
Iesus nos promoveat

In regno caelorum.

Christus, qui in utero

Virginis locatur,
Christus, qui ab utero

De hac incarnatur,
Christus, qui pro saeculo

Hic humiliatur,
Det, ut nobis miseris

Vita tribuatur.