102. Super Ave Maria.

1. Ave, mater Dei, ave,
Quae per verbum hoc suave
Natos Evae solvis a vae,

Virgo sine macula ;
Maria, tu stella maris,
Spes reorum singularis,
Dei natum, virgo, paris
Sine viri copula.

2. Gratia, quam meruisti,
Solvit nos a iugo tristi
Per Deum, quem concepisti,

Qui gubernat singula;
Plena omni puritate,
Nos ab hostis potestate
Reos tua bonitate

Tuere per saecula,

3. Dominus, qui te creavit,
Carnem sumens habitavit
In te, per quam expiavit

Protoplasti scelera;
Tecum Deus, virgo pura,
Creatorem creatura
Paris contra carnis iura,

O virgo puerpera.

4. Benedicta, gratiosa,
Dei mater gloriosa,
Fac, ut nobis sint exosa

Delictorum crimina ;
Tu caelorum es regina,
Peccatorum medicina,
Florens rosa sine spina,

Tu es mundi domina.

5. In caelis tu principans
Et in terris dominaris,
Sic prae cunctis expers paris,

Tibi sunt imperia ;
Mulieribus amanda
Es, Maria veneranda,
Quarum sexus est miranda

Salutis materia.

6. Et ruina reparatur
Evae, per te salus datur,
Eva in Ave mutatur

Evae verso nomine ;
Benedictus tuus natus,
Pro peccatis morti datus
Et in carne cruciatus

Misero pro homine.

7. Fructus tuus, Deus homo,
Protoplastum lapsum pomo
Eelevavit et in domo

Relocavit caelica;
Ventris tui dulcis fructus
Finem fecit nostri luctus,
Et evasit maris fluctus
Plebs Israelitica.

8. Tui servi defendantur
Nec ab hoste conterantur,
Per te, virgo, sed fruantur

Summi regis gloria;
Amen, amen iubilemus,
Et Mariam collaudemus,
Ut cum ipsa conregnemus
In caelesti curia.