104. Super Ave Maria.

1. Ave, mater gratiae,

Thalamus pudoris,

Fons misericordiae,

Salus peccatoris,

Thronus regis gloriae,

Templum redemptoris.

2. Maria, flos virginum,

Virens maris stella,

Mediatrix hominum,

Trinitatis cella,

Tergens sordes criminum,

Frangens hostis helia.

3. Gratiae septemplicis

Donis te vallavit,

Cum summi rex apicis

Caelos inclinavit,

Ut verbis propheticis

Dudum praesignavit.

4. Plena sancti spiritus,

Fusa caeli rore,

Concepisti caelitus

Absque carnis more,

Virgo velut primitus

Novo praestans flore.

5. Dominus, rex omnium,

De sede paterna

Venit in exsilium,

Non linquens superna,

Rex ante principium,

Quem timent Averna.

6. Tecum tota trinitas

Fecit mansionem,

Sed immensa caritas

Pegit unionem,

Claudit Sion civitas

Verum Salomonem.

7. Benedicta viscera,

Quae digna fuere,

Expiantem scelera

Mundi portavere,

Quae virtutum opera

Nobis paruere.

8. Tu in mulieribus

Virgo singularis,

Cumulatis laudibus

Digne veneraris,

Ut in luminaribus

Praeest lux solaris.

9. Benedictus filius

Tuus, rex caelorum,

Sortis nostrae socius,

Panis angelorum,

Sol eclipsis nescius,

Messis beatorum.

10. Fructus delectabilis

Est de te productus,

Per quem Evae flebilis

Terminatur luctus,

Fit Deus placabilis,

Daemon est seductus.

11. Ventris tui thalamus,

Arca testamenti,

Fragrat sicut balsamus

Christo venienti,

Aromatum thalamus

Nostri condimenti.