116. Super Ave Maria.

1. Ave, per quam filius

summae maiestatis
Sacco se circumdedit

nostrae paupertatis,
Pacem dans hominibus

bonae voluntatis,
Audi preces exsulum,

mater pietatis.

2. Maria, tu domina

sive stella maris
Syra vel hebraica

lingua nominans,
Et hoc non immerito,

quia Deum paris
Et mundum illuminans

ipsi dominaris.

3. Gratia, qua ceteros

omnes superasti,
Delevit chirographum

Adae protoplasti,
Tu regis amplexibus

frueris pro Vasthi,
Fac nobis placabilem

ipsum, quem Iactasti.

4. Plena cunctis opibus

et virtutum rosis,
Vas ornatum undique

gemmis pretiosis,
Orantes te petimus

manibus complosis,
Ut frui nos facias

locis amoenosis.

5. Dominus non quilibet,

sed rex angelorum
In tuis visceribus

fecit sibi thorum,
Tu decus et species

et exemplar morum,
Bonorum participes

fac nos aeternorum.

6. Tecum Dei filius

foedus innovavit,
Quod antiquis patribus

totiens iuravit,
Ipse te per spiritum

sanctum impraegnavit,
Ut dicatur, quod ex te

Dominus regnavit.

7. Benedicta series

Davidicae prolis,
Per quam ad nos prodiit

iubar veri solis,
Tu amicta variis

gratiarum stolis,
Da, ne nos decipiat

Satan suis dolis.

8. In cunctis hominibus

vel in creatura
Non habes consimilem

nec es habitura,
Virgo, cui data est

miserorum cura,
Ne sis tuis famulis

aspera vel dura.

9. Mulieribus inest

quoddam naturale,
Quod in partu rumpitur,

alvi penetrale,
Sed tu post vel antea

nihil passa tale,
Pudoris signaculum

habes aeternale.

10. Et quidem quis valeat
te digne laudare,
Per quam Deus voluit
mundum visitare?

Tu es super sidera

maius luminare,
Per quod transit naufragus

procellosum mare.

11. Benedictus thalamus

uteri materni,
Quo quievit filius

regis sempiterni,
Fac tuos a reprobis

in fine secerni,
Ne sint partes vulpium

aut cibus inferni.

12. Fructus tui palmitis

viti comparatur,
Cuius haustu dulciter

cor inebriatur,
Totum leve reputans.

quidquid patiatur,
Nam in Iesu nomine

totum levigatur.

13. Ventris haec integritas

nunquam est audita,
Quod in partu castitas

non est impedita,
Nullus hoc exprimere

potest in hac vita,
Totum tamen verum est

et factum est ita.

14. Tui ergo filii

redempti cruore
Perungi nos petimus

gratiae liquore,
Quo credentes in Iesum

gratiae amore
Coronemur gloria

simul et honore.

15. Amen dicant singuli,

quibus sacrum flamen
Per Mariae meritum

tribuat iuvamen,
Auferat a cordibus

criminum gravamen
Cum patre et filio

regnans semper. Amen.