119. Super Ave Maria.

1. Ave, praeclarissima

Mater salvatoris,

Maria dulcissima

Cura peccatoris.

2. Gratia per omnia

Maxime divina

Plena es, o domina,

Nobis hanc propina.

3. Dominus monarchiae

Spiritus virtute

Tecum, quem ora pie

Nostra pro salute.

4. Benedicta, caelitus

Manus quam creavit,

Tu, prout angelicus

Testis declaravit.

5. In termino, quo noto

Inter, super eas,

Mulieribus toto

Sexu fari queas.

6. Et in hoc adiungitur

Sanctum consecrato,

Benedictus fungitur

Ille se beato.

7. Fructus quam sit utilis,

Veritas testatur,

Ventris almae virginis,

Ubi sustentatur.

8. Tui matris, Domine,

Cui simus grati,

Amen patris nomine,

Spiritus et nati.