121. Super Ave Maria.

1. Ave, puella regia,
Virgo immaculata,

Virtutum insignia

Te reddunt Deo grata,

Per te nunc Evae taedia
Sint nobis oblata,
Tu Eva transversata

Mutans luctum in gaudium,
Ex hoc Ave vocata.

2. Maria, dux errantium,

Maria, stella maris,
Maria, caeli lilium,

Maria, lux solaris,
Maria, mundi gaudium

Et mater salutaris,

Audi, pro quo rogaris,
Praebe nobis solacium

In pressuris amaris.
3. Gratia tua mittitur

Tibi, inviolata,
Gratia tibi iungitur,

Antequam esses nata,
Gratiae fons dirigitur

Ad te, virgo sacrata,

A quo es fecundata,
Ex te gratia oritur

Gratis omnibus data.

4. Plena divinis laudibus,
Laetare, virgo pura,

Ditata donis omnibus
Prae omni creatura,

In terris nec caelestibus
Non est Dei factura
Nec post te est futura

Sic ornata virtutibus,
Sic pulchra in figura.

5. Dominus caeli solium
Nobis, virgo, paravit,

Supra suum imperium
Te matrem exaltavit,

Te gratiarum omnium
Datricem ordinavit,
Da, quod ipse mandavit,

Ora pro nobis filium,
Ne perdat, quos creavit.

6. Tecum in caeli gloria,
Tecum est Dei bonitas,

Tecum patris potentia
Tecum et tota trinitas,

Tecum persona media,
Quam induit humanitas
Et attraxit humilitas,

Tecum in caeli curia
Assit nobis societas.

7. Benedicta in milibus
Tu, virgo, comprobans,

Hinc a Christi fidelibus
Mater Dei vocaris

Et in choris caelestibus
Prae cunctis exaltaris,
Ab omnibus laudaris,

Iunge nos tuis precibus
Gloriae, qua ditaris.

8. Tu sponsa sacri flaminis,
Tu virginum regina,

Tu rosa pulchritudinis,
Tu mundi medicina,

O virgo, salus hominis,
Serva nos a ruina,
A morte repentina,

In nostrae vitae terminis
Nos iuvare festina.

9. In te sponsus est virginum,
In te laus beatorum,

In te mundator criminum,
In te salus iustorum,

In te creator omnium,
Plasmator angelorum,
Fons omnium bonorum,

In te sit nostrum gaudium
In choris supernorum.

10.Mulieribus gaudium
Per virginem donatur,

Laus, honor, decus, praemium
Per hanc eis praestatur,

Mulierum opprobrium
In honorem mutatur,
Quia recte probatur,

Quod per mulieris filium
Omnis homo salvatur.

11. Mulier, salus hominis,
Angelorum regina,

Haec est lavatrix criminis,
Peccati medicina,

Haec arca sacri flaminis,
Haec est vitae doctrina
Servans verba divina,

Haec est totius nominis
Camera crystallina

12. Mulier omnem hominem

excellit sanctitate
Angelorumque ordinem

Transcendit puritate
Daemonumque voraginem

Restringit potestate,

Dei auctoritate
Salvat Adae propaginem

A mortis vastitate.

13. Mulier auro purior

Maria comprobatur,

Ista sole lucidior
A nobis praedieatur,

Cunctis sanctis excelsior
Vere praeconizatur,
Ergo hic concludatur,

Quod muliere melior
Nulla factura datur.

14. Et benedictus rex omnium
Nunc a suis facturis,

Qui per te dat solacium
Omnibus creaturis,

Per te praestat suffragium
Et liberat a curis
Et a malis venturis,

Per te donet remedium
Hic in mortis pressuris.

15. Fructus in te colligitur

Ex virgineo flore,
Ex te, virgo, producitur

Fructus fragrans odore,
Quisquis hoc fructu vescitur,

Vivit fructus sapore

Et cum mentis dulcore
Ad regnum caeli mittitur,

Ut pleno gustet ore.

16. Ventris fructum esurio
Nec possum satiari,

Hunc fructum semper sitio
Et peto mihi dari

Hic in mortis passagio,
Ne possim contristari,
Sed in fructu lactari

Et fructus tandem gaudio
A poena liberari.

17. Tui sim, virgo regia,

Me tibi dedicavi,
Spernens mundana gaudia

Hunc ordinem intravi,
Filii tui praemia

Diu desideravi,

Da, quod semper optavi,
Et in mortis angustia

Me iuva, ut rogavi.

18. Iesus, sanctorum gloria,
Virgo, ad nos attendat,

Per te det caeli gaudia
Seque nobis ostendat,

Dictanti haec dictamina
Dona caeli impendat,
Pro munere rependat,

In hora mortis anxia
Nos a metu defendat.

19. Sancta in mulieribus
Tu, mater pietatis,

Pura, plena virtutibus,
Camera trinitatis,

Praelata caeli civibus
Et omnibus beatis,
Virgo, fons bonitatis,

Iunge nos tuis precibus
Luci aeteraitatis.

20. Maria, mater gratiae,
Te semper invocamus,

In hac valle miseriae
Ad te semper clamamus,

O regina clementiae,
Audi voces, quas damus,
Concede, quod rogamus,

Redde nos luci gloriae,
Ut tecum gaudeamus.

21. Mater Dei gratissima,
Mater caelestis roris,

Iesu mater carissima,
Mater nostri amoris,

Mater Iesu sanctissima,
Praesta dona honoris
In supernorum choris

Et in morte durissima
Pelle damna terroris.

22. Ora pro peccatoribus,
Peccati medicina,

A malis salva omnibus
Et a mortis ruina,

Iuva nos tuis precibus,
Nam per nos es regina,
Ergo aurem inclina

Sanctisque caeli civibus
Nos iungere festina.

23. Nobis praedicatoribus
Per te gratia detur,

Qua in mentis aspectibus
Verbum recte formetur,

Et tandem in sermonibus
Nomen Christi laudetur
Saneque praedicetur,

Et a Christi fidelibus
Postea operetur.

24. Virgo, caelesti gloria

Christus sic te dotavit,

Sic et replevit gratia,
Monilibus ornavit,

Quod sanctorum donaria
Nunc in te congregavit,
Divisa copulavit,

Unita tua praemia
Distinctis adaequavit.

25. Iesum pro nobis miseris,
Mater Dei, exora,

Cum nos a morte tuleris,
Vitam nobis implora,

Auctorem huius operis
Virtutibus decora,
In diversis honora,

Cum sibi bona dederis,
Suscipe mortis hora.