147. Super Ave. Maria.

1. Ave, virgo virginum,

digne salutata,
Salutis exordium,

salus exspectata,
Salutantes respice

salvatori grata,
Sana cordis intima

male sauciata.

2. Ave, sidus rutilans

Maria praeclare,
Stella maris, tenebras

potens illustrare,
Tui stillicidio

mellis dulcorare
Veni, quos amaritat

hoc amarum mare.

3. Ave, grata Domino

gratiam merendo,
Erui a vitiis

te rogamus flendo,
Gratiosa nobis sis

gratos faciendo,
Gratiae restitutens

ingratis parcendo.

4. Ave, mundi gloria,

Plena caeli porta,
Tua plenitudine

dirige detorta,
Plenitudo gratiae

cum ex te sit orta,
Ut mors in victoria

plene sit absorpta.

5. Ave, mater Domini,
Domino devota,
Dominorum dominus
per te nostra vota

Dirigat, ne fluctuet
in se mens aegrota,

Timens, quod non praeterit
nec apex nec iota.

6. Ave, tecum Dominus,

trinitas patenter,
Qui cum sanctis omnibus

vivit et decenter,
Tecum tamen voluit

esse differenter,
A quo sic repletus est

animus et venter.

7. Ave, mater Domini,

mater virgo dicta,
Signanter exprimens

esse b enedicta,
Benedici flagitat

a te plebs afflicta,
Circumventa fraudibus,

per suasum victa.

8. Ave, tu puerpera

sed divinae prolis,
Tu nata, tu genetrix,

tu aurora solis,
Nostris aufer mentibus

usum pravae molis,
Non est spes auxilii,

si iuvare nolis.

9. Ave, beatissima,

Deo praeelecta,
Inter Adae filias

maxime dilecta,
Immo super angelos

celsior effecta,
A supernis miseros

clementer aspecta.

10. Ave, motus nesciens

molientes serum,
Mulier, sed transiens

metas mulierum,
Ortum est in tenebris

ex te lumen verum,
Pium redde servulis

iudicem severum.

11. Ave, cuius utero

Deus humanatur,
Homini divinitas

in te copulatur,
Copula nos civibus

caeli, quibus datur,
Quo ruina superum

per te reparatur.
12. Ave, de qua prodiit

bellator invictus,
Qui est super omnia

Deus benedictus,
Pio vultu respice

tironum conflictus,
Hostiles insidias

repellas et ictus.

13. Ave, virgo germinans

pietatis fructus,
Gemebundos terminans

matris Evae luctus,
Involventes miseros

placa maris fluctus,
Homo miser zabulo

ne cadat seductus.

14. Ave, gerens Dominum

ventris in cubili,
Qui caelorum terminos

ambitu subtili
Continet, in stabulo

positus est vili,
Per te nos ab opere

redimat servili.

15. Ave, mater filii,

genitoris tui.
Super nos signatum est

lumen vultus sui,
Fac nos tuis precibus

pace vera frui,
Ut simus perenniter

coheredes tui.