150. Super Ave Maria.

1. Ave, virgo virginum,

Quae verbo concepisti,
Ave, lactans filium

Virgo permansisti,
Ave, caeli gaudium,

Nutrix Iesu Christi,
Salva nunc me miserum

In hoc mundo tristi.

2. Maria, mater Dei,

Thalamus amoris,
Maria, requiei

Sinus, fons dulcoris,
Maria, nostrae spei

Portus, pons terroris
Memento, quaeso, mei,

Caeci peccatoris.

3. Gratia plenissima,

Virgo, te refecit,
Gratia gratissima

Matrem te perfecit,
Gratia firmissima

In te non defecit,
Ille me reficiat,

Qui te talem fecit.

4. Plena pudicitiae,

Virgo singularis,
Plena laus ecclesiae,

Parens expers paris,
Plena vena veniae,

Clara stella maris,
Iunge me laetitae,

Quae sic iucundaris.

5. Dominus in utero

Tuo procreatus,
Dominus ab utero

Manans incarnatus,
Dominus pro populo

Sic humiliatus,
Sit mihi miserrimo

Per te dux placatus

6. Tecum manet deitas,

Nam Deus est tecum,
Tecum sancta trinitas

Et tu manens secum,
Tecum summa sanctitas,

Fac salutem mecum,
Errantem per tenebras

Illumina me caecum.

7. Benedicta domina

In concipiendo,
Benedicta femina

In parturiendo,
Benedicta virgula

Virgo permanendo,
Me, te precor, adiuva

Saltem moriendo.

8. Tu sedes in solio,
Virgo, coronata,
Tu gaudes cum filio,
Mater, iucundata

Tu replens gaudio

Prole sublimata,
Esto tuo famulo,

Mater, advocata.

9. In caelo te glorificat

Angelorum decus,
In terra te invocat

Latinus et Graecus,
In luce te collocat

Iesus ipsum secus,
Lux eadem luceat

Mihi, qui sum caecus.

10. Mulieribus piis

Tu es gubernatrix,
Mulieribus reis

Tu es sublevatrix,
Mulieribus cunctis

Es auxiliatrix,
Tu tanta, tam nobilis,

Sis mihi salvatrix.

11. Et tu, virgo, quanta sis,

Non potest enarrari,
Et quantum vales miseris,

Quis potest meditari?
Et ideo prae ceteris

Volo te precari,
Ne sinas me daemonis

Dolo defraudari.

12. Benedictus Dominus,

Qui tibi oboedivit,
Benedictus filius,

Qui de te exivit,
Benedictus spiritus,

Qui ambos univit,
Ille me reficiat,

Qui te sic munivit.

13. Fructus fervens floruit

De te cum dulcore,
Fructus fulgens exiit

De te cum decore,
Fructus fulgens prodiit

Repletus odore,
Fructus ille liberet

Me semper a languore.

14. Ventris sic integritas

Dat floris odorem,
Ventris ponderositas

Nescivit dolorem,
Ventris puri clausitas

Produxit hunc florem,
Meum tua bonitas

Minuat laborem.

15. Tui sacri nominis

Laus volat ubique,
Tui famam nominis

Dinoscunt plerique,
Tui spes iuvaminis

Nos regat undique,
Ne demum cum impiis

Damnemur inique.

16. Iesus nos eripiat

A coetu damnatorum,
Iesus nos edoceat

Passus electorum,
Iesus nos custodiat

In fine saeculorum,
Iesus nos promoveat

In regno caelorum.

17. Mater Dei et hominis,

Capax trinitatis,
Mater expers criminis,

Norma sanctitatis,
Mater veri luminis,

Fons es puritatis,
Fac me sequi iugiter

Viam veritatis.

18. Dei sponsa fulgida,

Candela lucis verae,
Dei stola nitida,

Nostri miserere,
Dei mater splendida,

Semper nos tuere,
Ut in meo obitu

Possim te videre.

19, Ora clemens filium,

Ut vivamus tute,
Ora regem omnium

Pro mentis virtute,
Ora natum proprium

Pro nostra salute,
Fac me tuum servulum

In tua servitute.

20, Pro nobis peccatoribus

Tu es sublimata,
Pro nobis orantibus

Assis advocata,
Pro nobis paenitentibus

Posce cuncta grata

21. Amen dicat clericus

Postulans solamen,
Amen dicat laicus

Cupiens levamen,
Amen dicant omnia,

Quae poscunt iuvamen,
Amen sit per saecula

Saeculorum, amen.