157. Ave Maria Aureum
de mirifica virginis Assumptione.

1. Beata plena gratia,
Maria, Iesu Christi,
Mater, sponsa et filia,
Quae virgo parturisti.

2. Ave, dulcis consolatrix
Orbitatis anxiae,
Angelorum imperatrix,
Para viam gratiae.

3. Laetitia septiformi
Tua nos corrobora,
Nostra ex usu enormi
Malis purga pectora.

4. Domina caelis praesidens,
Numinis sacrarium,
Super choros tu residens
Sis nostrum salarium.

5. Astra, throni, te angeli
Stupentes admirantur,
Vecta dum sis sic, singuli
Mirando venerantur.

6. Salutem in hoc saeculo
Post miseris ostende
Aeternam ex ergastulo
Dum imus, nos defende.

7. Afferens securitatem,
Stygis vetans devia,
Lumen et aeternitatem
Praesta, virgo regia.

8. Redde tandem solamina
Finale post examen
Tuis, dum omnis anima
Examinatur. Amen.