158. Super Ave Maria stella.

1. Ave, maris stella,

In qua digna cella

Deus incarnatur,

Dei mater alma,

Quae sursum ut palma

Iuste exaltatur.

2. Atque semper virgo,

Salutis origo,

Pacis initium,

Felix caeli porta,

Nos semper supporta

Per patrocinum.

3. Sumens illud ave

Tamquam procul a vae

Sic es salutata,

Gabrielis ore

Et superno rore

Tu es fecundata.

4. Funda nos in pace

Servans a fornace

Et a miseria,

Mutans nomen Evae

Vae facias breve,

O dulcis Maria.

5. Solve vincla reis

Et ostende eis

Fructum ventris tui,

Profer lumen caecis,

Ut a morsu necis

Eruantur tui.

6. Mala nostra pelle

Hostemque repelle

A te laudantibus,

Bona cuncta posce

Nobisque ignosce

Saepe peccantibus.

7. Monstra te esse matrem

Apud summum patrem

Interveniendo,

Sumat per te precem,

Qui destruxit necem

Pie moriendo.

8. Qui pro nobis natus

Fuit et est datus

Ad modum parvuli,

Tulit esse tuus,

Rex est perpetuus

Futuri saeculi.

9. Virgo singularis,

Modo gratularis

In curia poli,

Inter omnes mitis,

Fructificans vitis,

Nos commenda proli.

10. Nos culpis solutos,

Malis involutos,

Regina caelorum,

Mites fac et castos,

Alimento pastos

Pane angelorum.

11. Vitam praesta puram,

Da mentem securam

In perfectione,

Iter para tutum

Et ostende scutum

In protectione.

12. Ut videntes Iesum

Ad aeternum esum

In caeli curia

Semper collaetemur,

Tecum delectemur

O virgo regia.

13. Sit laus Deo patri

Atque eius matri

Ob eius honorem,

Summo Christo decus,

Qui nostrum dedecus

Mutet in decorem.

14. Spiritui sancto

Honor sit pro tanto,

Quia vivificat

Tribus honor unus,

Nobis detur munus,

quod beatificat.