159. Super Magnificat.

1. Ave, virgo virginum,

mater illibata,
Stella maris, Maria,

plene fecundata,
Lux illustrans omnia,

potens advocata,
Miserere miseris,

genetrix beata.

2. Magnificat te pia

mens rite sacrato,
Nostra advocatrix, fac,

ut mens cum palato
Laudis sint capacia

tibi atque nato,
Qui per te conumeret

gregi nos beato.

3. Et quam lingua deficit

digne praedicare,
Nec humana ratio

potest explicare,
Nobis autem sedulo

velis applicare
Et pio oraculo

filium placare.
4. Quia Dei genetrix,

virgo donis plena,
Exstirpatis vitiis

intus nos serena
Et nostrorum scelerum

hic indulta plena
Nos caelestis patriae

ducas ad amoena.

5. Quia tuus filius

sanitas et vita,
Eius ad laetitias,

pia, nos invita,
Sua nobis mansio

fiat per te sita,
In qua felix requies

consistat unita.

6. Et de tuis gratiis

nobis impertire,
Qui fidem operibus

nequimus unire,
Saltem nos hic doceas

tibi deservire,
Ut ad caeli gaudia

valeamus ire.

7. Fecit te lux gratiae,

per te ut lustremur,
Lumen nobis tribue,

mater, ut salvemur,
Ne culpis aut vitiis

ullis implicemur,
Sed tandem caelestibus

cboris aggregemur.

8. Deposuit potentes

per te, virgo grata,
Tua miseratio

nobis sit placata,
Nostra demum anima

a vitiis purgata
Gaudeat angelicas

turbae sociata.

9. Esurientes reple,

caelica regina,
Sana morbos animae

tua medicina,
Et quando progredimur

de mundi sentina,
Nos in caelo collocet

dextera divina.

10. Suscepit te Dominus,

cui supplicamus,
Ut poenas et laqueos

mortis evadamus
Ac tuis obsequiis

nos hic innectamus,
Illic ut felicia

regna conscendamus.

11. Sicut ab initio

templum trinitatis,
Sidus castimoniae,

flos virginitatis,
Lilium convallium,

mirae caritatis,
Plenitudo gratiae,

fons humilitatis.

12. Ergo excellentior

hominum facturis,
A terrenis omnibus

nos eripe curis
Atque sanctimoniae

circumsaepi muris,
Beatorum gaudiis

perpetim mansuris.