161. Aureum Alma B. 1. V.

1. Alma puella regia
Et domina egregia,

Virtutibus ornata,
Tua confer auxilia,
Ut depromamus carmina,

Quae utinam sint grata.

2. Redemptoris saeculorum,
Summi regis angelorum,

Placuisti oculis,
Qui salutem populorum
Dedit, ut hos supernorum

Iungeret consortiis.

3. Mater Dei eximia,
Qui de carne virginea

Carnem nostram induit,
Nam gens humana misera
Per Evam erat perdita,

Quam per te eripuit.

4. Quae ut Iudith speciosa,
In aspectu gratiosa

Hostem nostrum perimis,
Hesther nostra tu formosa,
Supplicando mente prona

Nos a morte redimis

5. Pervia viatoribus,
Lassati qui laboribus

Sunt ad te fugientes,
Hos suscipis amplexibus,
Subveniens defectibus,

Sint firmi et constantes.

6. Caeli cives te mirantur,
Vultum tuum venerantur,

Ut matrem sui regis,
Tuo velle munerantur
Hic qui tibi famulantur

Et postea in caelis.

7. Porta cunctis satis lata,
Potestate tibi data

Includis et excludis,
A quocunque sis pulsata,
Sine mora es parata,

Benigne introducis.

8. Manes fixa in promissis,
Verbis veris quibus dicis:
Transite ad me omnes,
Qui ardenter concupistis,
Voci meae oboedistis,
Estote nunc consortes.

9. Et stella nostra praevia
Praecedens, per te devia

Incerti ambulamus,
Directa nostra semita,
Nam nostra per te opera

Ad Deum dirigamus.

10. Maris fluctus tumescentes,
Corda nostra conturbantes

Cogitatus mitiga,
Ne nos poenae absorbentes
Et a Deo separantes

Laedamur in anima.

11. Succurre fragilitati,
Assuefacti pravitati

Nostrae velis compati,
Sunt subiecti vanitati
Omnes mundo procreati

Malisque obnoxii.

12. Cadenti manum protinus
Porrige, ne diutius

In malis delitescat,
Depositis veteribus
Actibus mox celerius

Ad bona convalescat.

13. Surgere nullus quiverit,
Si gratia defuerit,

Qua sibi suffragetur,
Quicunque hanc petierit,
Per te nancisci poterit,

Nam tibi nil negetur.

14. Qui profunde est demersus
In peccatis et aversus

A Deo totaliter,
Toto corde si conversus
Erit, satis et acceptus

Deo fit veraciter.

15. Curat, ne periclitatur,
Qui frequenter infestatur

Mundo, carne, daemone,
Horum quisque superatur,
Si devote invocatur

Maria ex nomine.

16. Populo tuo supplici
Precibus tuis subveni

In pace conservando,
Fac, legem servet Domini
Et caritatem proximi

In corde confirmando

17. Tu quae tanta reputans,
Quod prae cunctis dominaris

In caelis et in terris,
Quidquid exstat bonitatis,
Per te datur large satis

Ut stillans fave mellis.

18. Genuisti talem mundo,
Qui de monte venit summo

Ovem unam quaerere,
Se infixit in profundo
Limo mundi, ut immundo

Homini det surgere.

19. Natura quidquid produxit,
Ad se ipsum hoc reduxit

In cruce exaltatus,
Tunc sol, terra omnis luxit,
Donec verus sol illuxit

Surgens glorificatus.

20. Mirante tota machina,
Quod Deus mirabilia

Perfecit in te tanta,
Credendum est, quod opera
Non sunt patrata talia,

Ut tu es, mater sancta.

21. Tuum fructum benedictum
Mundi auferens delictum

Habere fac placatum,
Ne nos premat Ite strictum,
Sed Venite, dulce dictum,

Det regnum praeparatum

22. Sanctum illud totum erit,
Ibi clare relucebit

Trinitatis facies,
Congaudere tunc placebit,
Cum ovile unum erit,

Summa pax et requies.

23. Genitorem, qui dat esse
Rebus cunctis manifeste,

Hunc decet, collaudamus,
Pro collatis est necesse
Grates per te indefesse

Iugiter referamus.

24. Virgo stirpis Davidicae,
Exorta mundo splendide,

Pulchra tamquam Cynthia,
Ingressa es pacifice,
Et nomen tuum celebre

Redolet per omnia.

25. Prius eras figurata
Et in lege es velata,

Declarant rem iam gesta,
A prophetis prophetata,
Per auroram designata,

Ut Cynthius electa.

26. Ac posterius lex nova
Habet in textu et glosa

Ut praeclarum speculum,
Nostra dulcis tu es prosa,
Veneranda mente prona

Nunc et in perpetuum.

27. Gabrielis locutio
Te confortavit, quomodo

Adveniret spiritus,
Et summi obumbratio
Fecit, quod gravidatio

Sit portata levius.

28. Ab ore qui altissimi
Prodivit, in te humili

Mansit certo tempore,
Angustia tunc uteri
Est usus loco solii,

Ipsum lactans ubere.

29. Sumens munus exiguum
Habeto, quaeso, placitum

A despecto famulo,
Sub tuum qui praesidium
Fugit, videto miserum

Compassivo oculo.

30. Illud insuper est gratum,

Si per Ave salutatum

Pectus tuum fuerit,
Mox expandis sinum latum,
Dans odorem sicut pratum,

Plene cum floruerit.

31. Ave, plena, dulcis valde,
Salutata per haec, gaude,

Continent mysteria,
Primum signat te abs fraude
Et secundum omni laude

Plenam, o sanctissima.

32. Peccatorum advocata,
Intercedis, ne prolata

Feriat sententia,
Quae dum fuerit cassata,
Sint peccata relaxata

Ex Dei clementia.

33. Miserere, miserere,
Salus et spes nostra vere,
Da peccata nunc deflere,
Ne post mortem paenitere

Perpetue contingat ;
Hora mortis nos tuere,
Dic maligno: hinc recedet
Partem tecum fac habere,
Regnum Dei possidere,
Dicamus: Fiat, fiat.