166. Super Salve regina.

1. Salve, mater nostra pia,
Virgo dulcis, o Maria,
Eduxisti nos de via
Mortis et periculi.

2. Regina, hoc effecisti,
Nos de morte redemisti,
Quando Christum concepisti,
Salvatorem omnium.
8. Misericordiae planta,
Salus venit ex te tanta,
Exprimi non potest quanta
Nec in mente concipi.
4. Vitae nobis lumen dona,
Ut possimus mente prona,
Quae dedisti nobis, dona
Feliciter noscere.
5. Dulcedo sua conducat
Et ad pacem nos reducat
Et de morte nos educat
Per sui clementiam.

6. Spes, quam fide reportamus,
Supplicantes te rogamus,
Ut defendas, ne ruamus
In mortis periculo.
7. Nostra salus et benigna,
Omni laude certe digna,
Peccatores nos resigna
Ante tuum filium.
8. Salve, caelitus creata,
Per quam salus est parata,
Porta caeli reserata
Clausa peccatoribus.

9. Ad te, dulcis, nos speramus,
Confidenter preces damus,
Ut a te non discedamus,
Ut simus in gloria.
10. Clamamus ad te fidenter,
Nostris precibus clementer
Aurem praebe diligenter,
Ut simus in gloria.

11. Exsules sumus in mundo,
Maris stamus in redundo,
Nos extolle de profundo
Lacus et miseriae.
12. Filii nos sumus tui,
Dona nobis digne frui
De Iesu et regno sui
Per misericordiam.

13. Evae nomen maledixit,
Per te nobis lux revixit,
Christus nobis benedixit
Ventris tui gremio.

14. Ad te clamant omnes gentes,
Fac, ut sint proficientes
Et exclara cunctas mentes
In te confidentium.

15. Suspiramus et instanter,
Credimus indubitanter,
Quod nobis tu des Iactanter
Tui nati gratiam.

16. Gementes sumus turbati,
Passione tui nati,
Fac, ut simus inflammati
Et amore proximi.

17. Flentes sumus cum dolore
Pro peccatis, cum rubore,
Vivimusque cum sudore
In nostra miseria.

18. In hac vita dum vivemus,
Ut non mala reportemus,
Fac, ut tecum semper stemus
Et cum tuo filio.

19. Lacrimarum sumus pleni,
Regni dulcis et amoeni,
O rex bone, precor, veni,
Da nobis laetitiam.

20. Valle sumus circumdati
Propter nebulam peccati,
Fac, ut simus inflammati
Claritatis munere.

21. Eia ergo, mater poli,
Nos commenda tuae proli,
Ne errores sive doli

Nos supplantent hostium.

22. Advocata nostra semper
Nobis sis indiffidenter,
Ut portemus reverenter
Passionem Domini.

23. Illos, qui te amant, rege
Et ab omni malo tege,
Ut assistant coram rege
Sempiternae gloriae.

24. Tuos servos nos guberna
Et in pace nos conserva,
Absit a nobis proterva
Daemoniorum rabies.

25. Misericordes fac ut simus,
Ut servire nos possimus
Creatori, quem nescimus
Amare sicut convenit.

26. Oculos iam fide dignos,
Misericordes et benignos
Tu nobis ostende, dignos
Omni reverentia.

27. Ad nos, benigna mater Dei,

Licet mortis simus rei,

Inclina te et bonae spei

Da perseverantiam.

28. Converte, pravae ut mentes
De peccatis sint dolentes
Et veniam deprecantes
A misericordia.
29. Iesum, nostrum redemptorem,
Redde nobis amatorem,
Aufer a nobis dolorem
Inferni miseriae.

30. Benedictum sit, o Christe,
Nomen tuum, crucifixe,
Peccatoribus assiste,
Ut peccatis caveant.
31. Fructum tuum, Iesum Chri-
stum,
Culpa nostra crucifixum,
Placa nobis semper istum
Tuis rogaminibus.

32. Ventris tui generosi
Concepti miraculosi
Germinisque pretiosi
Fructum fide credimus.
33. Nobis ergo, gloriosa
Virgo, sine spina rosa,
Praebe nobis virtuosa
Munera suscipere.

34. Post hoc naufragium peccati
Per te simus reparati,
Deo reconciliati

Ad habendam gratiam.
35. Exsilium erat grave,
Quando dictum fuit Ave,
Commutatur in suave
Divina providentia.

36. Ostende viam virtutum,
Nobis iter para tutum,
Fervens sit cor et non mutum
Tuis dignis laudibus.

37. O clemens, o cara mater,
Cuius natus est et pater,
Non sufficit nihil quater
Te laudare meritis.
38. O pia, fons pietatis,
O dulcedo caritatis,
Tu nos redemisti gratis
A morte perpetua.

39. O dulcis nostrae salutis
Recuperatrix, virtutis
Dona pacem constitutis
In mundi naufragio.

40. Virgo, flos virginitatis,
Splendor verae caritatis,
Ante thronum maiestatis
Recommenda supplices.

41. Maria, tu stella maris,
Super omnes ordinans,
Dulce certe veneraris
Angelorum coetibus.

42. In extrema mortis hora,
Benedicta mater, ora,
Ut possimus sine mora
Transire ad requiem.

43. Quod nobis dare dignetur,
Per quem mundus renovetur,
Qui regnat et miseretur
In saeculorum saecula.