23.

1. Corde vero
Ac sincero

Nos condecet psallere
Et psallentes
Nostras mentes

Ad Christum erigere.

2. Ecce certum
Et apertum,

Qualiter hoc tempore
Actor lucis
Sanctae crucis
Vicerit in arbore.

3. Laude dignum
Est hoc lignum,

Quo nos suo sanguine
Christus lavit
Et purgavit

A noxae caligine.

4. Agnus Dei,
Quem Judaei

Occidere perfidi,
Sua morte
Claustra forte

Hostis fregit callidi.

5. Vita mundo
Moribundo

Christi morte redditur,
Mors devicta
Ut afflicta

Gemit et conqueritur.

6. Hinc descendit,
Qui pependit

Pro redimendis suis,
Ad inferna,
Die terna

Resurgens a mortuis.

7. O quam grata
Et beata

Est haec resurrectio,
Per quam vitae
Victo Dite

Datur reparatio.

8. Fractis portis
Domus mortis

Rex triumphat aetheris,
Cum dilectis
Hinc ejectis

Rediit ab inferis.

9. Ergo toto
Cordis voto

Oremus, ut gaudium
Nobis caeli
Praestet Heli

Per crucis mysterium.